رامبن کے کچھ علاقوں میں صورتحال واقعی خراب ہے: وزیر اعلی عمر عبداللہ

سرینگر / /21اپریل . جموں و کشمیر کے وزیر اعلیٰ عمر عبداللہ نے پیر کے روز کہا کہ جموں کے رامبن ضلع میں بادل پھٹنے سے پیدا ہونے والے بڑے پیمانے پر لینڈ سلائیڈنگ اور سیلاب کی وجہ سے صورتحال خاص طور پر قومی شاہراہ کے آس پاس واقعی خراب ہے۔کشمیرنیوز سروس ( کے این ایس ) کے مطابق علاقے میں کم از کم تین افراد ہلاک اور جموں سری نگر قومی شاہراہ کے متعدد مکانات، گاڑیاں اور کچھ حصے اچانک سیلاب کی وجہ سے ملبے کے ڈھیر میں تبدیل ہو گئے۔عبداللہ نے سری نگر میں نامہ نگاروں کو بتایا، "رامبن سے آنے والی رپورٹوں سے پتہ چلتا ہے کہ کچھ علاقوں میں صورتحال واقعی خراب ہے، خاص طور پر ہائی وے (جموں سری نگر ہائی وے) کے آس پاس”۔نہوں نے یقین دلایا کہ شاہراہ کو جلد از جلد بحال کرنے کے لیے جنگی بنیادوں پر کوششیں جاری ہیں۔انہوں نے کہا کہ ہائی وے کی بحالی کے ساتھ ساتھ، ہماری توجہ لینڈ سلائیڈنگ سے متاثرہ رہائشی علاقوں کی بحالی پر بھی ہے۔وزیر اعلیٰ نے کہا کہ راحت کا انتظام کیا جا رہا ہے جموں و کشمیر حکومت اس معاملے پر مرکزی حکومت تک پہنچنے کی کوشش کر رہی ہے۔عبداللہ نے کہا، "ہم متاثرہ لوگوں کو معاوضہ دینے کے لیے وزیر اعظم کے ریلیف فنڈ اور دیگر دستیاب وسائل کو استعمال کرنے کی کوشش کر رہے ہیں۔”عبداللہ نے لوگوں پر زور دیا کہ وہ پرسکون رہیں اور جموں سری نگر ہائی وے کی بندش کی وجہ سے ذخیرہ اندوزی یا بلیک مارکیٹنگ میں ملوث نہ ہوں۔انہوں نے خبردار کیا کہ "ضروری اشیاءکی کوئی کمی نہیں ہے۔ میں عوام سے اپیل کرتا ہوں- براہ کرم ذخیرہ اندوزی نہ کریں۔ جو بھی شخص بلیک مارکیٹنگ یا قیمتوں میں غیرضروری اضافہ کرتا پایا گیا تو اسے سخت کارروائی کا سامنا کرنا پڑے گا۔” "اہلکاروں کو ہدایات جاری کی گئی ہیں کہ وہ ایف آئی آر درج کریں اور ضرورت پڑنے پر گرفتاریاں کریں۔”عمرعبداللہ نے تصدیق کی کہ جموں سری نگر ہائی وے ابھی کے لیے بند ہے، لیکن مغل روڈ کھلا ہے۔انہوں نے کہا کہ اگر ضرورت ہو تو مغل روڈ کے ذریعے سامان لایا جا سکتا ہے۔ ہمیں امید ہے کہ ایک یا دو دن میں ہائی وے کم از کم یک طرفہ ٹریفک کے لیے بحال ہو جائے گی۔نیشنل کانفرنس کے رہنما نے یہ بھی اعلان کیا کہ وہ صورت حال کا جائزہ لینے اور عہدیداروں کے ساتھ میٹنگ کرنے کے لیے ذاتی طور پر رامبن کا دورہ کریں گے۔