وادی میں اشیائے ضروریہ کا وافر ذخیرہ موجود

سرینگر /کے این ایس /21اپریل . صوبائی کمشنر کشمیر، وی کے بدھوری نے پیرکہا کہ کشمیر میں اشیاءضروری وافر مقدار میں موجود ہے انہوں نے عوام سے اپیل کی ہے کہ وہ افواہوں پر کان نہ دھریں ۔ کشمیر نیوز سروس ( کے این ایس ) کے مطابق صوبائی کمشنر نے کہا کہ دی میں پیٹرول، ڈیزل، ایل پی جی اور غذائی اجناس کی دستیابی کو لے کر کسی بھی قسم کی گھبراہٹ کا شکار نہ ہوں کیونکہ تمام ضروری اشیاءکا وافر ذخیرہ موجود ہے اور صورت حال مکمل طور پر قابو میں ہے۔سری نگر میں نامہ نگاروں سے بات کرتے ہوئے وی کے بدھوری نے کہا، وادی میں غذائی اجناس کا کافی ذخیرہ دستیاب ہے۔انہوں نے بتایا کہ ایل پی جی کا بھی 17 دن کا اسٹاک دستیاب ہے، جو موجودہ صورتحال کے پیشِ نظر کافی ہے۔ایندھن کی صورتحال پر بات کرتے ہوئے ڈویڑنل کمشنر نے کہا کہ کشمیر میں یومیہ تقریباً ایک ہزارکلو لیٹر ڈیزل استعمال ہوتا ہے، اور اس وقت 12ہزار5سو کلو لیٹر کا ذخیرہ موجود ہے، جو تقریباً ۱۲سے ۱۳ دن کے لیے کافی ہے۔اسی طرح، پیٹرول کے بارے میں انہوں نے کہا کہ یومیہ استعمال 625کلو لیٹر ہے اور وادی میں اس وقت تقریباً 10ہزار کلو لیٹر پیٹرول موجود ہے۔عوام کو پیٹرول پمپس پر قطاریں لگانے یا گھبراہٹ کا شکار ہونے کی کوئی ضرورت نہیں ہے۔ صورت حال معمول کے مطابق اور مکمل طور پر قابو میں ہے انہوں نے مزید کہا۔