کولگام/یکممئی2025ئوزیر برائے صحت و طبی تعلیم ، سماجی بہبود اور تعلیم سکینہ اِیتو نے دیہی صحت کے ڈھانچے کو مضبوط بنانے کے لئے ایک اہم پیش رفت کے طور پر آج ڈِی ایچ پورہ میں 50 بستروں پر مشتمل شہید ولی محمد اِیتو میموریل سب ڈِسٹرکٹ ہسپتال (ایس ڈِی ایچ) اور احمد آباد کولگام میں نو تعمیر شدہ نیو ٹائپ پرائمری ہیلتھ سینٹر (این ٹی پی ایچ سی ) کا اِفتتاح کیا۔ صحت سہولیات سے مقامی آبادی کی دیرینہ مانگ پوری ہوئی ہے اور یہ صحت سہولیات دیہی علاقے میں طبی خدمات کی بہتری کے لئے ایک سنگ میل ثابت ہوں گی۔پولیس ہاو¿سنگ کارپوریشن کے ذریعے سب ڈِسٹرکٹ ہسپتال 11 کروڑ روپے کی لاگت سے تعمیر کیا گیا ہے۔ یہ ہسپتال بڑی آبادی کو طبی خدمات فراہم کرے گا اور معیاری صحت سہولیات تک رَسائی کو بہتر بنائے گا۔اِس موقعہ پر وزیر موصوفہ نے عوامی اِجتماع سے خطاب کرتے ہوئے دیہی صحت شعبے کو مضبوط بنانے کے لئے حکومت کے عزم کا اعادہ کیا اور سب کے لئے مساوی صحت خدمات کو یقینی بنانے کے لئے ایسے منصوبوں کی اہمیت پر زور دیا۔اُنہوں نے مزید کہا کہ عمر عبداللہ کی قیادت میں حکومت عوامی فلاح و بہبود کے لئے پُرعزم ہے اور حالیہ مہینوں میں جموں و کشمیر کے لوگوں کی زندگی کو بہتر بنانے کے لئے متعدد اقدامات کئے گئے ہیں۔ وزیر موصوفہ نے متعلقہ حکام کو ہدایت دی کہ ہسپتال میں 30 بستروں پر مشتمل آیوش سہولیت بھی فراہم کی جائے۔
مقامی لوگوں نے علاقے کی اہم طبی ضروریات کو پورا کرنے کےلئے حکومت کے فعال اَقدامات پر شکریہ اَدا کیا۔بعد ازاں، وزیر موصوفہ نے احمد آباد کولگام میں شہید سبزار احمد شاہ میموریل گرلز ہائی سکول کا بھی دورہ کیا۔اِس موقعہ پر سکینہ اِیتو نے طلباءاور عملے سے بات چیت کرتے ہوئے جموں و کشمیر کے ہر کونے میں معیاری تعلیم کی فراہم کرنے پر حکومت کی توجہ کو اُجاگر کیا۔
