سرینگر پیپلز ڈیموکریٹک پارٹی (پی ڈی پی) کی صدر اور سابق وزیر اعلیٰ محبوبہ مفتی نے منگل کو کہا کہ جموں و کشمیر کشمیری پنڈتوں کے بغیر نامکمل ہے۔انہوںنے عقیدت مندوں کے استقبال کے لئے گاندر بل کا دورہ کیا۔کشمیر نیوز سروس ( کے این ایس ) کے مطابق تلمولہ میں ماتا کھیر بھوانی مندر میں نامہ نگاروں سے بات کرتے ہوئے محبوبہ مفتی نے کہا کہ وہ یہاں عقیدت مندوں کا استقبال کرنے آئی تھیں۔انہوں نے کہا کہ جموں و کشمیر کشمیری پنڈتوں کے بغیر نامکمل ہے۔ جموں و کشمیر سے متعلق مسائل کو فوجی حل یا عسکریت پسندوں کی بندوقوں سے حل نہیں کیا جا سکتا۔انہوں نے مزید کہا کہ سیاسی حل کی ضرورت ہے اور یہ اس وقت تک ممکن نہیں جب تک کے پی کے لوگ وقار کے ساتھ واپس نہیں آتے اور اس سلسلے میں اپنا کردار ادا نہیں کرتے۔
