امر ناتھ یاترا کے کئے کثیر سطحی حفاظتی انتظامات:آئی جی پی کشمیر

سرینگر /آئی جی پی کشمیر وی کے بردی نے بدھ کو کہا کہ آئندہ امرناتھ یاترا کے لئے سیکورٹی کو یقینی بنانے کے اقدام میں، جموں و کشمیر پولیس نے دیگر سیکورٹی فورسز کے ساتھ مل کر کثیر سطحی اور جامع انتظامات کئے ہیں۔انہوں نے کہا امسال گزشتہ سالوں کے نسبت حفاظتی انتظامات کو مزید سخت کر دیا گیا ہے ۔آئی جی پی نے کہا تیاریوں کے لئے پوری وادی میں ماک ڈرل چل رہے ہیں۔کشمیر نیوز سروس ( کے این ایس ) کے مطابق بردی نے جنوبی کشمیر کے اننت ناگ میں نامہ نگاروں کے ساتھ بات چیت کے دوران کہا کہ، "تمام حفاظتی انتظامات کو زون اور سیکٹرز میں تقسیم کیا گیا ہے۔” "اسٹینڈرڈ آپریٹنگ پروسیجر (ایس او پی) کی مشقیں پوری وادی میں کی جا رہی ہیں۔”انہوں نے کہا کہ مشقیں کیمپوں، سڑکوں کے ساتھ ساتھ اور اندرونی علاقوں میں کی جا رہی ہیں تاکہ کسی بھی ہنگامی صورتحال سے نمٹنے کے لیے تمام یونٹوں کو تیار کیا جا سکے۔انہوں نے مزید کہا کہ "مقصد یہ یقینی بنانا ہے کہ تمام سیکورٹی فورسز اپنی مخصوص ذمہ داریوں سے واقف ہوں۔” "یہ یاترا کے دوران کسی بھی ہنگامی صورت حال میں تیاری اور ہم آہنگی کو برقرار رکھنے میں مدد کرتا ہے۔مقامی باشندوں کے کردار کے بارے میں ایک سوال کے جواب میں بردی نے کہا کہ یاترا کی کامیابی کا انحصار ان کے تعاون پر ہے۔ انہوں نے کہا، "یہ یاترا مقامی باشندوں کی مدد اور تعاون سے کامیاب ہوتی ہیں۔””مقامی لوگوں نے جوش و خروش کا مظاہرہ کیا ہے اور خدمات اور مدد فراہم کرکے فعال طور پر حجاج کی مدد کر رہے ہیں۔خیال رہے سالانہ امر ناتھ یاترا3جولاائی کو شروع ہو رہی ہے جہاں اب تک لاکھوں کی تعداد میں لوگوں نے رجسٹریشن کی ہے ۔اس دوران دونوں راستوں پر حفاظت کے بہترین انتظامات کئے گئے ہیں ۔خیال رہے امر ناتھ یاترا یہاں ہر سال منعقد کی جاتی ہے جہاں لاکھوں کی تعداد میں لوگ اس میں حصہ لے رہیں جبکہ مقامی کشمیر ی ہر بار اس یاترا کے ساتھ جڑے رہتے ہیں ۔