سرینگر//بھارت کے پارلیمانی امور اور اقلیتی امور کے وزیر، کرن رجیجو نے حج کے حوالے سے ایک دو طرفہ معاہدے کو حتمی شکل دینے کے لیے سعودی عرب کا سرکاری دورہ کیا۔دورے کے دوران، انہوں نے سعودی عرب کے وزیر برائے حج و عمرہ، معالی توفیق بن فوزان الربیعہ سے مثبت بات چیت کی۔کشمیرنیوز سروس ( کے این ایس ) کے مطابق سعودی عرب پہنچنے پر کرن رجیجو کا پرتپاک استقبال کیا گیا، جہاں سفیر ڈاکٹر سہیل خان اور نائب وزیر برائے امور عمرہ، پروفیسر عبدالعزیز اے وازن نے ان کا خیرمقدم کیا۔ بعد ازاں، نائب وزیر نے رجیجو کے اعزاز میں ایک رسمی عشائیہ دیا، جس سے دونوں ممالک کے مابین خوشگوار تعلقات کا اظہار ہوا۔13جنوری کو بھارتی وزیر اور معالی توفیق بن فوزان الربیعہ نے حج 2025 کے لیے دو طرفہ معاہدے پر دستخط کیے۔ بات چیت کے نتیجے میں 1,75,025 بھارتی عازمین حج کے لیے کوٹہ مختص کیا گیا، جو ایک اہم پیش رفت ہے۔ دونوں فریقین نے عازمین کو بہترین خدمات فراہم کرنے کے عزم کا اعادہ کیا اور اس روحانی سفر کی اہمیت کو اجاگر کیا۔سابقہ ٹویٹر (اب X) پر رجیجو نے اس سنگ میل کو شیئر کرتے ہوئے کہا:”حج 2025 کا معاہدہ معالی توفیق بن فوزان الربیعہ، وزیر برائے حج و عمرہ، مملکت سعودی عرب کے ساتھ طے پایا۔ بھارت سے 1,75,025 عازمین کے کوٹہ کو حتمی شکل دی گئی۔ ہم اپنے تمام عازمین حج کو بہترین ممکنہ خدمات فراہم کرنے کے لیے پرعزم ہیں۔”حج کا سفر بھارتی عازمین کے لیے بے حد روحانی اہمیت رکھتا ہے اور ان کے ایمان سے گہرا تعلق قائم کرتا ہے۔ اس حقیقت کو مدنظر رکھتے ہوئے، بھارتی حکومت اس مقدس سفر کو تمام شرکاءکے لیے آسان اور آرام دہ بنانے کے لیے پرعزم ہے۔
