مکمل اختیارات کیساتھ ریاستی درجہ واپس ملنے کی پوری اُمید

سری نگر:۲۲، اگست:  : نیشنل کانفرنس کے صدر فاروق عبد اللہ نے جمعرات کو کہا کہ جموں و کشمیر کی تمام90 اسمبلی سیٹوں پر کانگریس کےساتھ اتحاد حتمی ہے۔جے کے این ایس کے مطابق ڈاکٹر فاروق کی جانب سے یہ اعلان لوک سبھا میں قائد حزب اختلاف راہول گاندھی اور کانگریس صدر ملکارجن کھرگے کی نیشنل کانفرنس کی قیادت سے عبداللہ کی رہائش گاہ پر ملاقات کے بعد سامنے آیا۔فاروق عبداللہ نے نامہ نگاروں کو بتایاکہ ہماری ملاقات خوشگوار ماحول میں ہوئی۔ اتحاد ٹریک پر ہے اور انشاءاللہ کامیابی سے چلے گا۔نیشنل کانفرنس کے صدر نے کہاکہ دونوں جماعتوں کے درمیان اتحاد حتمی ہے۔ انہوںنے کہاکہ اس پر آج (جمعرات )کی شام دستخط ہوں گے اور اتحاد تمام 90 نشستوں پر ہے ۔جموں و کشمیر کی 90 رکنی اسمبلی کے لیے تین مرحلوں میں انتخابات18 ستمبر، 25 ستمبر اور یکم اکتوبر2024 کو ہوں گے، نتائج کا اعلان 4 اکتوبر کو کیا جائے گا۔ ڈاکٹر فاروق بداللہ نے مزید کہاکہ سی پی آئی (ایم) کی بھی ہمارے ساتھ ہیں۔ انہوںنے کہاکہ مجھے امید ہے کہ ہمارے لوگ بھی ہمارے ساتھ ہیں اور ہم لوگوں کی زندگیوں کو بہتر بنانے کے لئے بھاری اکثریت سے جیتیں گے۔راہول گاندھی کی اس یقین دہانی کے بارے میں پوچھے جانے پر کہ جموں و کشمیر کو ریاست کا درجہ بحال کرنا کانگریس اور ہندوستانی بلاک کی ترجیح ہے، فاروق عبداللہ نے امید ظاہر کی کہ تمام اختیارات کے ساتھ مکمل ریاست کا درجہ بحال کیا جائے گا۔نیشنل کانفرنس کے صدر نے کہاکہ ریاست کا درجہ ہم سب کےلئے بہت اہم ہے۔ انہوں نے کہاکہ یہ وعدہ ہم سے کیا گیا ہے۔ اس ریاست(جموں وکشمیر) نے برے دن دیکھے ہیں اور ہمیں امید ہے کہ یہ اپنے مکمل اختیارات کے ساتھ بحال ہو جائے گی۔فاروق عبداللہ نے کہاکہ اس کے لیے، ہم انڈیا بلاک کے ساتھ کھڑے ہیں۔