سرینگر//کے این ایس5جنوری : صوبہ جموں کے ضلع کشتواڑ کے مسو پاڈر علاقے میں اتوار کے صبح ایک گاڑی کے گہری کھائی میں گرنے سے کم از کم 4 افراد ہلاک اور دیگر 2لاپتہ ہوئے جن کی تلاش جاری ہے جبکہ واقعے کے بعد علاقے میں بچاو کارروائیوں کو تیز کیا گیا ہے ۔حادثے پر مرکزی وزیر ڈاکٹر جتندر سنگھ سمیت کئی سیاسی رہنماﺅں نے دکھ اور افسوس کا اظہار کیا ۔کشمیر نیوزسروس ( کے این ایس) کے مطابق ایک بولیرو کیمپر سڑک سے ا±لٹ کر گوار ماسو کے مقام پر کھائی میں جا گرا۔ جائے حادثہ سے چار لاشیں نکال لی گئی ہیں، لاپتہ افراد کی تلاش کے لیے ریسکیو آپریشن چلایا جا رہا ہے۔اس واقعے پر بات کرتے ہوئے ایک سینئر پولیس اہلکار نے کہا کہ، "چار افراد کی ہلاکت کی تصدیق ہو چکی ہے، اور فی الحال علاقے میں ریسکیو کارروائیاں جاری ہیں۔” جب ان سے دو لاپتہ افراد کے بارے میں پوچھا گیا تو انہوں نے مزید کہا کہ تفصیلات پتہ کی جا رہی ہیں۔ اس المناک واقعے کی تصدیق مرکزی وزیر ڈاکٹر جتیندر سنگھ نے کی۔ انھوں نے سوشل میڈیا پلیٹ فارم ایکس پر ایک پوسٹ کرتے ہوئے سوگوار خاندانوں کے ساتھ تعزیت کا اظہار کیا۔ مرکزی وزیر نے لکھا کہ، ابھی یہ جان کر دکھ ہوا کہ گاڑی میں سفر کرنے والے مسافروں میں سے 4 موقع پر ہی مردہ پائے گئے ہیں۔ ڈرائیور سمیت دو دیگر افراد کا ابھی تک پتہ نہیں چل سکا ہے۔ سوگوار خاندانوں سے میری دلی تعزیت۔ڈاکٹر جتیندر سنگھ نے یہ بھی بتایا کہ وہ کشتواڑ کے ڈپٹی کمشنر راجیش کمار شاون کے ساتھ رابطے میں ہیں تاکہ صورتحال پر گہری نظر رکھیں۔ وزیر نے فالو اپ اپ ڈیٹ میں کہا کہ، ریسکیو ٹیموں کو حرکت میں لایا گیا ہے۔مقامی لوگوں اور ریسکیو ٹیموں کو دشوار گزار علاقے کی وجہ سے چیلنجز کا سامنا ہے کیونکہ وہ زندہ بچ جانے والوں کو تلاش کرنے یا لاشیں نکالنے کے لیے انتھک کوشش کر رہے ہیں۔ حادثے کا شکار ہونے والوں کی شناخت اور حادثے کی اصل وجہ معلوم کرنے کی کوشش جاری ہے۔پولیس نے واقعے کے حوالے سے ایک کیس درج کر کے مزید تحقیقات شروع کی ہے ۔
