سری نگر:۰۳، مارچ:رام نومی کے موقع پر کشمیری پنڈتوں نے جمعرات کوسخت سیکورٹی بندوبست کے بیچ سری نگر میں شوبا یاترا نکالی جبکہ یہ تہوارپوری کشمیروادی میں مذہبی جوش و خروش کے ساتھ منایا گیا۔جے کے این ایس کے مطابق روایتی لباس میں ملبوس پنڈت بچوں وبچیوں اور مردوزن کے ایک گروپ نے مندروںکے پجاریوںکی قیادت میںجمعرات کو سری نگر کے علاقے ٹنکی پورہ کے کتھلیشور مندر سے ایک شوبایاترا نکالی۔ سیکورٹی کے انتظامات کے بیچ یاترامیں شامل لوگ حبہ کدل، گنپت یار، بربر شاہ، ریگل چوک، لال چوک، ہری سنگھ ہائی اسٹریٹ اور جہانگیر چوک کی سڑکوں سے ہوتے ہوئے پُرامن طور گزرے ۔اس دوران یاترامیں کشمیری پنڈتوں کی شوبایاترا’ہری راما ہری راما‘ کے نعرے لگاتے ہوئے پرامن طریقے سے سبھی علاقوں وبازاروں سے گزری۔سری نگر شہر کے مختلف مقامات پر اکثریتی برادری کے افراد بھی سڑک کے کنارے ان کا استقبال کرتے ہوئے دیکھے گئے۔پولیس نے بتایا کہ حفاظتی دستوں کو احتیاطی تدابیر کے طور پر مختلف مقامات پر تعینات کیا گیا تھا۔کشمیر کی ہندﺅ ویلفیئر سوسائٹی کے صدر چونی لال نے کہا کہ شوبا یاترا کے نکالنے کے اتھ ہی نو روزہ رام نومی، بھگوان رام کا جنم دن، تہوار اختتام پذیر ہوا۔انہوں نے کہا کہ ان تمام دنوں کے دوران ملک اور جموں و کشمیر کے امن اور خوشحالی کےلئے خصوصی دعائیں کی گئیں۔
