صوبائی کمشنر کشمیر وجے کمار بدھوری نے ہفتہ کو کہا کہ کشمیر میں یوم آزادی کے موقع پر کوئی پابندی نہیں ہوگی جبکہ انٹرنیٹ اور سہولیات بھی آسانی سے کام کریں گی۔کشمیر نیوز سروس ( کے این ایس ) کے مطابق بیدھوری نے یہاں اپنے دفتر کے چیمبر میں ایک نیوز کانفرنس سے خطاب کرتے ہوئے کہا کہ یوم آزادی کے پرامن انعقاد کو یقینی بنانے کے لیے تمام انتظامات کو حتمی شکل دے دی گئی ہے۔انہوں نے مزید کہا کہ سری نگر میں مرکزی تقریب کے مقام کو جگہ کی کمی کے پیش نظر ایس کے اسٹیڈیم سے بخشی اسٹیڈیم میں تبدیل کردیا گیا ہے کیونکہ اس سال انتظامیہ کو اس تقریب میں لوگوں کی بڑی تعداد میں شرکت کی توقع ہے۔بیدھوری نے لوگوں کو کل صبح 6 بجے بوٹینیکل گارڈن سے ترنگا ریلی میں شرکت کی دعوت دی اور 15 اگست کو ہونے والی مرکزی تقریب میں شرکت کی اپیل بھی کی اور کہا کہ پاس کی ضرورت نہیں ہے۔ انہوں نے کہا کہ یہ سب کے لیے کھلی دعوت ہے۔انہوں نے کہا کہ کشمیر بھر میں 77ویں آزادی کی تقریبات کے پرامن انعقاد کو یقینی بنانے کے لیے ضروری سیکورٹی اور دیگر اقدامات کیے گئے ہیں۔
