سرینگر / ملک کے عوام کو یوم آزادی کی تقریبات سے قبل اپنے سوشل میڈیا ہینڈل پر اپنی پروفائل تصویر کو ”ترنگا“میں تبدیل کرنے کی اپیل کرتے ہوئے وزیر اعظم نریندر مودی نے کہا کہ ’ترنگا ‘آزادی اور قومی اتحاد کے جذبے کی علامت ہے۔ ہر ہندوستانی کا ترنگا سے جذباتی تعلق ہے اور یہ ہمیں قومی ترقی کیلئے مزید محنت کرنے کی ترغیب دیتا ہے۔سی این آئی کے مطابق وزیر اعظم نریندر مودی نے ٹویٹر پر ٹویٹ کرتے ہوئے لکھا ”ہر گھر ترنگا تحریک کے جذبے کے تحت آئیے اپنے سوشل میڈیا اکاﺅنٹس کی ڈی پی کو تبدیل کریں اور اس انوکھی کوشش کی حمایت کریں جو ہمارے پیارے ملک اور ہمارے درمیان رشتے کو گہرا کرے گی“۔ انہوں نے مزید لکھا ” ہندوستانی عوام اس سال 13 سے 15 اگست تک’ ہر گھر ترنگا‘تحریک میں حصہ لیں رہے ہیں۔وزیر اعظم مودی نے کہا کہ ہندوستانی پرچم آزادی اور قومی اتحاد کے جذبے کی علامت ہے اور لوگوں سے ترنگا کے ساتھ اپنی تصاویر ‘ ہر گھر ترنگا’ ویب سائٹ پر اپ لوڈ کرنے کی اپیل کی ہے۔انہوں نے ٹویٹ میں لکھا ” ترنگا آزادی اور قومی اتحاد کے جذبے کی علامت ہے۔ ہر ہندوستانی کا ترنگے سے جذباتی تعلق ہے اور یہ ہمیں قومی ترقی کیلئے مزید محنت کرنے کی ترغیب دیتا ہے۔ میں آپ سب سے گذارش کرتا ہوں کہ 13 سے 15 اگست کے درمیان ہر گھر ترنگا تحریک میں حصہ لیں“۔ دریں اثنا، لال قلعہ پر وزیر اعظم نریندر مودی کے یوم آزادی پر پرچم کشائی کی تقریب میں پورے ہندوستان سے تقریباً 1800 خصوصی مہمان شرکت کریں گے۔
