سری نگر:۸۲، دسمبر: : لیفٹیننٹ گورنر منوج سنہا کی صدارت میں انتظامی کونسل نے جموں و کشمیر پنچایتی راج ایکٹ 1989 میں ترمیم کرنے کی منظوری دی تاکہ اس ایکٹ میں OBCsیعنی دیگر پسماندہ طبقہ جات کی تعریف کو شامل کیا جا سکے تاکہ اس نچلی سطح کی جمہوری ادارے میں ان کی ریزرویشن کو یقینی بنایا جا سکے۔جے کے این ایس کے مطابق جمعرات کوسرمائی راجدھانی جموںمیں انتظامی کونسل کی ایک اہم میٹنگ لیفٹیننٹ گورنر منوج سنہا کی صدارت میں منعقد ہوئی ،جس میں لیفٹیننٹ گورنر کے مشیرراجیو رائے بھٹناگر، چیف سکریٹری اتل ڈلواور لیفٹیننٹ گورنر کے پرنسپل سکریٹری ڈاکٹر مندیپ کے بھنڈاری نے شرکت کی۔قبل ازیں جے اینڈ کے پنچایتی راج ایکٹ (ترمیمی) بل 2023 کا مسودہ مرکزی وزارت داخلہ حکومت ہند کو پیش کیا گیا تھا اور مرکزی وزارت داخلہ کی طرف سے اٹھائے گئے مشاہدات کا جائزہ لیا گیا تھا اور جے اینڈ کے پنچایتی راج ایکٹ (ترمیمی) بل کے نظرثانی شدہ مسودے میں ضروری ترامیم شامل کی گئی تھیں۔ترمیمی بل میں دیگر پسماندہ طبقات کے لئے ریزرویشن فراہم کرنے کی غرض سےOBCs یعنی دیگر پسماندہ طبقہ جات کی تعریف کو شامل کرنے، حلقہ پنچایت کی رُکنیت سے نااہلی کے طریقہ کار کی وضاحت، سرپنچ، نائب سرپنچ اور پنچ کو سرکار کی جانب سے معطل کرنے اور ہٹانے کی تجویز ہے۔ یہ یہاں ریاستی الیکشن کمشنر کی برطرفی اور سروس کی شرائط کی بھی وضاحت کرتا ہے۔مجوزہ ترامیم کا مقصد جے اینڈ کے پنچایتی راج ایکٹ، 1989 کوPRIیعنی منتخب عوامی نمائندوں کے کام کاج میں شفافیت، آئینی صف بندی اور دیگر ریاستوں کے طرز عمل کے ساتھ مطابقت کو یقینی بنا کر مزید موثر بنانا ہے جہاں درج فہرست ذاتوں اور درج فہرست قبائل کے علاوہ او بی سی کو ریزرویشن فراہم کیا گیا ہے۔
