نئی دہلی /۷ جون
این ڈی اے کی پارلیمانی پارٹی نے متفقہ طور پر نریندر مودی کو اپنا لیڈر منتخب کر لیا ہےجس کےساتھ ہی ان کا مسلسل تیسری مرتبہ وزیراعظم بننے کی راہ ہموار ہوگئی ہے ۔ توقع ہے کہ نریندر مودی 9جون کو اپنے وزارتی کونسل کے ہمراہ حلف لیں گے۔ تفصیلات کےمطابق نئی دہلی میں این ڈی اے پارلیمانی پارٹی کی میٹنگ کے دوران، سینئر بی جے پی لیڈر اور مرکزی وزیر راج ناتھ سنگھ نے شری نریندر مودی کو این ڈی اے لیڈر کے طور پر منتخب کرنے کی تجویز پیش کی اور این ڈی اے میں شامل تمام حلقوں کے لیڈروں نے اس کی حمایت کی۔نریندر مودی کا نام تجویز کرتے ہوئے راج ناتھ سنگھ نے کہا کہ وہ اس عہدے کے لیے سب سے موزوں شخص ہیں۔ انہوں نے کہا کہ یہ اتحاد کوئی مجبوری نہیں بلکہ ہمارا عزم ہے۔اس تجویز کی حمایت کرتے ہوئے مرکزی وزیر داخلہ امیت شاہ نے کہا کہ یہ نہ صرف این ڈی اے پارلیمانی پارٹی کے اجلاس میں بیٹھے لیڈروں کی بلکہ اس ملک کے 140 کروڑ عوام کی خواہش ہے۔سینئر بی جے پی لیڈر اور مرکزی وزیر نتن گڈکری نے کہا کہ وزیر اعظم مودی نے پوری لگن کے ساتھ کام کیا ہے تاکہ یہ یقینی بنایا جا سکے کہ ملک خوشحال ہو اور سپر پاور بنے۔ٹی ڈی پی کے سربراہ چندرابابو نائیڈو نے کہا کہ نریندر مودی کی دور اندیش قیادت میں این ڈی اے حکومت نے پچھلے دس سالوں میں اہم اقدامات کئے ہیں۔ انہوں نے کہا کہ ملک نے غیر معمولی ترقی اور تبدیلی دیکھی ہے۔وزیر اعظم مودی کی حمایت کا اظہار کرتے ہوئے بہار کے وزیر اعلیٰ اور جے ڈی یو کے صدر نتیش کمار نے کہا کہ یہ بہت اچھی بات ہے کہ ہم سب ایک ساتھ آئے ہیں اور اب ہم سب نریندر مودی کی قیادت میں مل کر کام کریں گے۔اس موقع پر خطاب کرتے ہوئے وزیر اعظم نریندر مودی نے کہا کہ این ڈی اے پارٹیوں کا گروپ نہیں ہے جو اقتدار کے لیے اکٹھے ہوئے ہیں بلکہ یہ ایک ایسا اتحاد ہے جو سب سے پہلے قوم کے جذبے کے ساتھ کام کرنے کے لیے پرعزم ہے۔ انہوں نے کہا، این ڈی اے ہندوستان کی تاریخ کا سب سے کامیاب اتحاد ہے اور ہمارا مقصد تمام فیصلوں میں اتفاق رائے تک پہنچنا ہے۔ مسٹر مودی نے کہا کہ آج ملک کے عوام نے 22 ریاستوں میں حکومت بنا کر این ڈی اے کو خدمت کرنے کا موقع دیا ہے۔نریندرمودی نے کہا، این ڈی اے حکومت اچھی حکمرانی، ترقی اور عوامی کی فلاح وبہبود پر توجہ دے گی۔ انہوں نے کہا کہ پچھلے دس سالوں میں این ڈی اے نے ملک کو کامیابی کی نئی بلندیوں پر لے جانے کا کام کیا ہے۔ مسٹر مودی نے کہا، ایک مشترکہ چیز جو این ڈی اے کی قیادت کے تمام ستونوں میں موجود ہے وہ ہے گڈ گورننس۔بی جے پی کے صدر جے پی نڈا نے کہا، این ڈی اے کو مسلسل تیسرے سال لوک سبھا انتخابات میں اکثریت ملی۔ انہوں نے کہا کہ اوڈیشہ اور آندھرا پردیش میں ہمیں جو کامیابی ملی ہے وہ قابل تعریف ہے۔مرکزی وزراء پیوش گوئل، انوراگ سنگھ ٹھاکر، ایل جے پی (آر) چیف چراغ پاسوان، این سی پی لیڈر اجیت پوار، آر ایل ڈی چیف جینت چودھری، جن سینا سربراہ پون کلیان، اپنا دل (ایس) لیڈر انوپریا پٹیل، جے ڈی (ایس) لیڈر ایچ ڈی کمار سوامی شامل ہیں۔ اجلاس میں موجود دیگر افراد کے درمیان اس کے علاوہ اتر پردیش کے وزیر اعلی یوگی آدتیہ ناتھ، گجرات کے وزیر اعلی بھوپیندر پٹیل، مہاراشٹر کے وزیر اعلی ایکناتھ شندے، مدھیہ پردیش کے وزیر اعلی موہن یادو، گوا کے وزیر اعلی پرمود ساونت، آسام کے وزیر اعلی ہمنتا بسوا سرما اور منی پور کے وزیر اعلی این بیرن سنگھ نے بھی میٹنگ میں شرکت کی۔
