سرینگر:۱۶؍جون
برصغیر ہندوپاک بشمول جموں وکشمیرمیں عیدالاضحی کی تقریب سعیدآج یعنی17جون سوموارکوپوری اسلامی عقیدت واحترام کیساتھ منائی جارہی ہے،اوراس بابرکت دن کو انفرادی اوراجتماعی انداز میں منانے کی تمام ضروری تیاریاں مکمل کرلی گئی ہیں ۔جموں وکشمیرکی انتظامیہ نے عیدالاضحی منانے اوراس دن ہونے والے عظیم الشان نماز عید کے اجتماعات کے پیش نظراپنی جانب سے تمام ضروری انتظامات اور اقدامات روبہ عمل لائے ہیں ۔سعودی عرب سمیت عرب ممالک میں ہفتہ کو عیدالاضحی کی تقریب سعیدمنائی گئی ۔تفصیلات کے مطابق آج عیدالاضحی ہے ،اور آج صبح سے ہی پورے جموں وکشمیر میں لاکھوں فرزندان توحید نزدیکی عیدگاہوں ،جامع مساجد ،امام باڈوں ،زیارت گاہوں اور آستانوںمیں منعقد ہونے والے عظیم الشان اجتماعات میں شرکت کیلئے روانہ ہونگے۔راستے میں” اللہ اکبر اللہ اکبر لا الہ الا اللہ واللہ اکبر اللہ اکبر وللہ الحمد“کا ورد کرتے ہوئے لوگ بشمول بچے ،نوجوان اور بزرگ صاف وپاک اور مختلف رنگوں کے لباس زیب تن کرکے اورسرپر ٹوپیاں پہن کرنما زعیداداکرنے کیلئے جائیں گے ۔جموں وکشمیرمیں نما ز عیدالاضحی کا سب سے بڑا اورعظیم الشان اجتماع تاریخی درگاہ حضرت بل سری نگرمیں منعقد ہورہاہے ،جہاں لاکھوں لوگوںکی شرکت متوقع ہے ،یہاں وقف بورڈنے نمازیوںکی سہولیت کیلئے کئی اقدامات اُٹھائے ہیں ،جن میں تپتی دھوپ کے پیش نظر نمازیوں کیلئے خیمے نصب کرانا بھی شامل ہے ۔تاریخی جامع مسجد سری نگرواقع نوہٹہ میں نماز عید کے اجتماع کو لیکر ابھی تذبذب برقرار تھا کیونکہ حکام کی جانب سے یہاں نماز عید اداکرنے کی اجازت دینے یا نہ دینے سے متعلق صورتحال واضح نہیں ہوئی تھی ۔سری نگرمیں دیگر کئی مقامات پر واقع مساجد ،خانقاہوں ،آستانوں اور زیارت گاہوںمیں بھی نماز عید کے بڑے بڑے اجتماعات منعقد ہونگے ۔اُدھر کشمیرکے باقی 9اضلاع بشمول بڈگام ،گاندربل ،بارہمولہ ،کپوارہ ،بانڈی پورہ ،اننت ناگ ،پلوامہ ،کولگام اور شوپیان کے علاوہ جموں ،رام بن ،ڈوڈہ ،بھدرواہ ،کشتواڑ ،راجوری ،نوشہرہ ،پونچھ اور دیگر مقامات پر بھی نماز عیدکے روح پرور اجتماعات منعقد ہونگے ،جہاں لاکھوں فرزندان توحید باجماعت نماز ادا کرکے اللہ کے حضورسربسجودہونگے ۔6تکبیرات کیساتھ نماز عید اداکی جائیگی اوراسکے بعدامام صاحبان خطبہ پیش کریں گے ،جس کو خاموشی کیساتھ سننا واجب قرار دیاگیا ہے ۔موسمی صورتحال بہتر اورخوشگوار رہنے کے بموجب جموں وکشمیرکے اطراف واکناف میں نماز عیدکے بیشتر اجتماعات عیدگاہوں اور دوسرے کھلے مقامات پر ہی منعقد ہورہے ہیں ۔نماز عید کی ادائیگی کیلئے الگ الگ علاقوںمیں واقع مساجد ،عیدگاہوں اور دوسری عبادت گاہوںمیں الگ الگ وقت مقرر کیاگیا ہے ۔اور اطلاعات کے مطابق نماز عیدا داکرنے کا سلسلہ پیر کو صبح 6بجے سے شروع ہوگا اور اکثر مقامات پر واقع عیدگاہوں اور دوسری عبادت گاہوں میں نما زعید کے اجتماعات صبح 10بجے تک مکمل ہوجائیں گے اوراسکے بعد لوگ اپنے گھروںمیں سنت ابراہیمی پر عمل کرتے ہوئے اللہ کی رضا اورخوشنودی کیلئے جانوروںکی قربانی دیں گے اور پھر قربانی کے گوشت کو تین حصوں میں بانٹ کر ہمسایوں ،دوست واحباب اور مسکینوںمیں تقسیم کیاجائے گا۔اللہ تعالیٰ ہم سب کو عیدالاضحی صحت مندی ،خوشی اور اصل پیغام کیساتھ منانے کی ہمت اورتوفیق عطافرمائے ،آمین ۔
