سری نگر:یکم جنوری: : کشمیر سے کنیا کماری تک ریل سروس چلانے کے منصوبے کا پہلا اوراہم ترین مرحلہ پایہ تکمیل تک پہنچ گیاہے ،کیونکہ شمالی ریلوے نے کٹرہ جموں سے سری نگرکے درمیان پہلی بار ٹرین کے اوقات کا اعلان کردیاہے ۔جے کے این ایس کے مطابق شمالی ریلوے کی طرف سے جموں اور جموںو کشمیر کے گرمائی دارالحکومت سری نگر کے درمیان پہلی بار ٹرین کے اوقات کا اعلان کرنے کےساتھ کشمیر کےلئے براہ راست ٹرین سروس بالآخر حقیقت بن رہی ہے۔شمالی ریلوے کے ایک مواصلت کے مطابق ٹرین سروس میں نئی متعارف کرائی گئی وندے بھارت ٹرینیں، میل اورایکسپریس ٹرینیں شامل ہیں۔شمالی ریلوے کی جانب سے دئیے گئے ٹرین کے اوقات کے مطابق وندے بھارت ایکسپریس ،کٹرا (SVDK) سے روانہ صبح8بجکر10منٹ پرروانہ ہوگی اورصبح11بجکر20منٹ پرسری نگر پہنچے گی۔اسی طرح میل/ایکسپریس صبح9بجکر50منٹ پرکٹرہ سے روانہ ہوگی اوردوپہر ایک بجکر دس منٹ پرسری نگرپہنچاکرے گی۔میل/ایکسپریس روزانہ بعددوپہر3بجے کٹرا سے روانہ ہوکر شام 6بجکر20منٹ پر سری نگر پہنچے گی۔میڈیا رپورٹس کے مطابق اس تاریخی ٹرین سروس کا افتتاح وزیر اعظم نریندر مودی 6 جنوری کو کریں گے، جب کہ یوم جمہوریہ کی تقریبات کے موقع پر 26 جنوری کو کشمیر اور جموں کے درمیان ٹرینوں کی آمد متوقع ہے۔ حکام نے بتایاکہ ٹرین کی خدمات سفری وقت میں نمایاں طور پر کمی کرکے اور مسافروں کو خطے کے قدرتی مناظر کے ذریعے آرام دہ سفر کی پیشکش کرکے سفری تجربات کو تبدیل کریں گی۔جیسے کہ میڈیا رپورٹس میں پہلے بتایاگیاہے کہ کشمیر کو نئی دہلی سے براہ راسے ریلوے سروس سے جوڑنے کا خواب نئے سال کے تیسرے یا چوتھے ہفتے میں شرمندہ تعبیرہونے کی توقع ہے ،کیونکہ وزیر اعظم نریندر مودی ممکنہ طورپر 20جنوری کے آس پاس میں5 نئی جدید ترین ٹرینوں کا افتتاح کرنے والے ہیں، جن سے دہلی اور کشمیر کے درمیان رابطے میں اضافہ ہوگا۔ ہر ٹرین22 کوچز پر مشتمل ہوگی۔ حکام نے بتایاہے کہ وادی کشمیر کو باقی ملک سے ملانے والی ٹرین خدمات کے آغاز سے پہلے، وزیر اعظم نریندر مودی 6 جنوری کو نئی دہلی سے جموں ریلوے ڈویڑن کا عملی طور پر افتتاح کریں گے۔جموں کو ریلوے ڈویڑن کے طور پر نامزد کرنے کا فیصلہ ملک کے مختلف حصوں سے وادی کشمیر کے لئے بہت زیادہ منتظر ٹرین کے آغاز سے پہلے آیا ہے۔ فی الحال، ٹرین خدمات سنگلدان اور بارہمولہ کے درمیان چلتی ہیں۔تاہم، ریلوے اب کٹرا،ریاسی سیکشن پر ٹرینوں کی آزمائشی کارروائی کر رہا ہے۔ تقریباً 18 کلومیٹر پر محیط کٹرا ریاسی اس منصوبے کا ایک اہم حصہ ہے۔حکام نے مزید بتایاکہ کشمیر جانے والی ٹرین کو وزیر اعظم نریندر مودی 20 جنوری کے آس پاس کسی بھی وقت شروع کر سکتے ہیں۔ تاہم ابھی تک افتتاح کی تاریخ اور جگہ طے نہیں کی گئی ہے۔ملک کے دیگر حصوں کے علاوہ نئی دہلی،سری نگر،بارہمولہ کے درمیان کئی ٹرینیں چلانے کی تجویز ہے۔حکام کاکہناہے کہ یو ایس بی آر ایل پروجیکٹ کی تکمیل کا مقصد ایک جدید ترین ریل انفراسٹرکچر بنانا ہے جو بین الاقوامی معیارات پر پورا اترتا ہو، مسافروں کو بہترین سہولیات اور خدمات فراہم کرے۔ کٹرا-ریاسی سیکشن تکنیکی طور پر جدید اور جدید ترین انفراسٹرکچر سے لیس ہے، بشمول جدید سگنلنگ سسٹم، سرنگیں اور پل۔حکام کے مطابق وزیر اعظم مودی دہلی کو کشمیر سے جوڑنے والی5 نئی جدید ٹرینوں کا افتتاح کریں گے،مسافروں کےلئے زیادہ سے زیادہ آرام کو یقینی بنانے کےلئے جدید ٹیکنالوجی اور ڈیزائن کو شامل کیا جائے گا۔ ہر ٹرین22 کوچز پر مشتمل ہوگی اور یہ مکمل طور پر ایئر کنڈیشنڈ سلیپر ٹرینیں خاص طور پر کشمیر کی سرد آب و ہوا کو پورا کرنے کے لیے آن بورڈ ہیٹنگ سسٹم سے لیس ہیں، جو سخت سردیوں کے مہینوں میں سفر کا ایک آرام دہ تجربہ فراہم کرتی ہیں۔ مزید برآں، ٹرینوں میں جموں و کشمیر کی منفرد حفاظتی ضروریات کو مدنظر رکھتے ہوئے، اضافی حفاظتی جانچ سمیت حفاظتی اقدامات میں اضافہ کیا جائے گا۔ہندوستانی ریلوے نے اعلان کیا کہ5 ٹریک سروس کے لیے تیار ہیں، حالانکہ ٹرینیں ایک ساتھ نہیں بلکہ مرحلہ وار متعارف کرائی جائیں گی
