سری نگر /17جنوری2025ئڈائریکٹر ہینڈی کرافٹس اینڈ ہینڈ لوم کشمیر مسرت اسلام نے جموں و کشمیر میں خواتین کاریگروں کو بااِختیار بنانے کی سمت میں ایک اہم قدم اُٹھاتے ہوئے سری نگر کے نور باغ علاقے میں نور آری کرافٹس پروڈیوسر کمپنی کی خواتین مالکان میں شیئر سرٹیفکیٹ تقسیم کئے۔جہلم اینڈ توی فلڈ ریکوری پروجیکٹ (جے ٹی ایف آر پی) کے تحت 2020 میں قائم کیا گیا نور آری کرافٹس نہ صرف دیرپامعاش کو فروغ دیتا ہے بلکہ خطے میں خواتین کی مضبوطی اور کاروباری جذبے کو بھی اُجاگر کرتا ہے۔
پروڈیوسر کمپنی کو حکومت جموںوکشمیر کی طرف سے شروع کردہ عالمی بینک کے تعاون سے بحالی کے منصوبے کے ایک حصے کے طور پر تشکیل دیا گیا تھا۔ اس نے روایتی دستکاریوں کو بحال کرنے میں اہم رول اَدا کیا ہے جبکہ دستکاروں کے لئے مارکیٹ کے بہتر مواقع پیدا کئے ہیں۔ کمپنی مکمل طور پر خواتین کے زیر اِنتظام ہے جو علاقے میں خواتین کو بااِختیار بنانے کی ایک طاقتور علامت کے طور پر کام کرتی ہے۔
ڈائریکٹر موصوف نے اَپنے خطاب میں کاریگروں کی لگن کی سراہنا کی اور ہینڈی کرافٹس اینڈ ہینڈلوم شعبوں میں خواتین کے لئے مواقع بڑھانے کے لئے حکومت کے عزم کا اعادہ کیا۔اُنہوں نے کہا،”نور آری کرافٹس اور کاروباری جذبے کی ایک شاندار مثال ہے۔ حکومت کو ان اَقدامات کی حمایت کرنے پر فخر ہے جو نہ صرف ہماری روایتی دستکاریوں کی حفاظت کرتے ہیں بلکہ خواتین کو مالی خود مختاری حاصل کرنے اور معیشت میں بامعنی حصہ اَدا کرنے کے لئے بااِختیار بناتے ہیں۔“ اُنہوں نے کاروباری صلاحیت کو زیادہ سے زیادہ کرنے کے لئے ڈیزائنوں کو متنوع اور جدید بنانے کی اہمیت پر بھی زور دیا۔
شیئر سر ٹیفکیٹ کی تقسیم دستکاروں کے لئے ایک سنگ میل کی حیثیت رکھتی ہے جو نور آری کرافٹس کی ترقی میں ان کی ملکیت اور فعال شرکت کی علامت ہے۔ یہ اَقدام اِس بات کو یقینی بناتا ہے کہ خواتین نہ صرف اُجرت کمانے والی ہیں بلکہ اَپنے کاروباری اِداروں میں اہم شراکت دار اور فیصلہ ساز بھی ہیں۔اِنتظامیہ سکل ڈیولپمنٹ، مالی شمولیت اور مارکیٹ تک بہتر رسائی کے ذریعے خطے کے سماجی و اِقتصادی منظر نامے کو مضبوط بنا رہی ہے۔
تقریب کا اِختتام نور آری کرافٹس کی ہاتھ سے تیار کردہ عمدہ اور شاندارمصنوعات کی نمائش کے ساتھ ہوا جس میں کشمیری دستکاری کی شاندار روایت اور اس کی خواتین کاریگروں کے تخلیقی صلاحیتوںکو اُجاگر کیا گیا۔ یہ اَقدام جموں و کشمیر کی خواتین کے لئے بڑے خواب دیکھنے اور اَپنی پوری صلاحیت کو بروئے کار لانے کے لئے ایک تحریک اور ترغیب کے طور پر کام کرتا ہے۔
