سرینگر /جموں وکشمیر پردیش کانگریس کمیٹی کے صدر طارق حمید قرہ کا کہنا ہے کہ وہ بھارت اور پاکستان کے درمیان بات چیت کے خیال کی سخت الفاظ میں مذمت کرتے ہیں۔ انہوں نے کہا کہ ”کانگریس پارٹی پاکستان کے خلاف مرکزی حکومت کے کسی بھی اقدام کی مکمل حمایت کرتی ہے۔‘کشمیرنیوز سروس( کے این ایس ) کے مطابق ‘ پہلگام حملے کے پس منظر میں بھارتی ایکشن کے حوالہ سے میڈیا نمائندوں کے ساتھ بات کرتے ہوئے طارق قرہ نے کہا کہ کانگریس نے اس معاملے کی سخت ترین الفاظ میں مذمت کی ہے اور ان کے موقف میں کوئی ”اگر یا مگر نہیں ہے“۔قرہ نے کہا کہ دہشت گردوں نے ہمیشہ بھارت اور پاکستان دونوں کے لیے تباہی لائی ہے اور وضاحت کی کہ ”انہوں نے کبھی بات چیت کے بارے میں کچھ نہیں کیا۔“ قرہ نے ان باتوں کا اظہار جموں میں طلب کیے گئے اسمبلی کے خصوصی اجلاس کے بعد جموں میں میڈیا نمائندوں کے ساتھ بات چیت کے دوران کیا۔ اسمبلی میں پہلگام حملے کی شدید مذمت کی گئی اور سبھی اراکین کے صوتی ووٹ کی منظوری سے ایک قرارداد پاس کی گئی، جبکہ متعدد اراکین نے بھی اپنے خیالات کا اظہار کیا۔ادھر، کانگریس کے سینئر رہنما غلام احمد میر نے بھی دہشت گردی کے مقابلے میں مرکزی حکومت کے ہر فیصلے کی مکمل حمایت کا اعلان کیا۔ انہوں نے ماضی کے دہشت گردانہ حملہ گنواتے ہوئے کہا کہ اس وقت بھی کانگریس نے مکمل سپورٹ کیا تھا آج بھی ہم مرکزی سرکار کے ساتھ کھڑے ہیں، تاہم ’کوئی ٹھوس اقدامات اٹھائے جائیں‘۔
