سرینگر /حکام نے پیر کی صبح بتایا کہ پاکستان نے جموں اور کشمیر میں لائن آف کنٹرول (ایل او سی) پر مسلسل چوتھی رات جنگ بندی کی خلاف ورزی کی۔ پاکستانی فوجیوں نے کپواڑہ-پونچھ سیکٹر میں بلا اشتعال فائرنگ کی۔ اس میں کسی جانی نقصان کی اطلاع نہیں ہے تاہم صورت حال بدستور کشیدہ ہے۔کشمیرنیوز سروس ( کے این ایس ) کے مطابق ہندوستانی فوج نے ایک بیان میں کہا کہ "27-28 اپریل کی درمیانی شب، پاکستانی فوج کی چوکیوں نے لائن آف کنٹرول کے پار کپواڑہ اور پونچھ اضلاع کے مقابل علاقوں میں چھوٹے ہتھیاروں سے بلا اشتعال فائرنگ شروع کی جس کا ہندوستانی فوج "تیز اور مو¿ثر طریقے سے” جواب دیا۔یہ پہلا موقع تھا جب پاکستانی فوج نے پونچھ سیکٹر میں جنگ بندی کی خلاف ورزی کی۔ جموں و کشمیر کے پہلگام میں گزشتہ منگل کو دہشت گردانہ حملے میں 26 افراد کی ہلاکت کے بعد ہندوستانی اور پاکستانی فوجیوں کے درمیان فائرنگ کا تبادلہ شروع ہوا۔سیکورٹی فورسز نے 22 اپریل کو پہلگام دہشت گردانہ حملے کے بعد وادی کشمیر میں انسداد دہشت گردی کی کارروائیوں کو تیز کردیا جس میں 26 افراد ہلاک ہوئے تھے۔ہندوستانی فوج نے کہا کہ اس کے اپنے فوجیوں نے مناسب چھوٹے ہتھیاروں سے موثر جواب دیا۔ دریں اثنا، کولگام پولیس نے فوج اور سی آر پی ایف کے ساتھ ایک مربوط آپریشن میں دو دہشت گرد ساتھیوں کو گرفتار کیا اور جنوبی کشمیر کے کولگام ضلع میں اسلحہ اور گولہ بارود کا ایک ذخیرہ برآمد کیا۔ادھر کشمیر کے مختلف علاقوں میں ملی ٹنسی مخالف آپریشن بڑے پیمانے پرجاری ہے ۔
