سید اعجاز
اونتی پورہ//ڈی آئی جی آئی آر پی کشمیر رینج عبدالقیوم نے پیر کو جنوبی کشمیر کے پلوامہ ضلع کے لیتھ پورہ میں آئی آر پی 23ویں بٹالین کے بٹالین ہیڈ کوارٹر کا دورہ کیا۔ایک بیان کے مطابق کمانڈنٹ آئی آر پی 23 ویں بٹالین باقر سامون نے دیگر گزیٹڈ افسران کے ہمراہ ان کا پرتپاک استقبال کیا اور گارڈ آف آنر بھی پیش کیا۔بیان میں کہا گیا ہے کہ انہوں نے بعد میں ایک میٹنگ کی صدارت کی جس میں کمانڈنٹ باقر سامون، پرنسپل سی ٹی سی لیتھ پورہ، تنویر جیلانی، ایڈجوٹینٹ ہیرا لال پنڈتا اور ڈپٹی کمانڈنٹ مشتاق احمد نے شرکت کی۔اجلاس کے دوران بٹالین کے افسران کو درپیش مسائل جیسے رہائش کا مسئلہ، ٹرانسپورٹیشن کا مسئلہ اور دیگر مسائل پر تبادلہ خیال کیا گیا۔”اس کے علاوہ، جموں و کشمیر پولیس کی طرف سے منعقد ہونے والی 71 ویں آل انڈیا پولیس فٹ بال چیمپئن شپ 2022-23کے کھلاڑیوں کے لیے رہائش کے بارے میں پرنسپل سی ٹی سی لیتھ پورہ سے تبادلہ خیال کیا گیا۔انہوں نے مزید کہا کہ کمانڈنٹ آئی آر پی 23ویں بٹالین نے ڈی آئی جی کو زیر تعمیر بٹالین ہیڈ کوارٹرز کی موجودہ صورتحال پر بریف کیا۔انہوں نے ڈی آئی جی کا بھی شکریہ ادا کیا کہ انہوں نے ہیڈ کوارٹر کا دورہ کرنے کے لیے اپنا قیمتی وقت نکالا۔
