جموں:یکم مارچ:مرکزی وزیرداخلہ امت شاہ کی ہدایت پر جموں وکشمیرکے3روزہ دورے پر پہنچی ،وازارت داخلہ کی اعلیٰ سطحی ٹیم نے منگل کوجموں پہنچنے کے بعد یہاں لیفٹنٹ گورنر منوج سنہا اورچیف سیکرٹری ڈاکٹر ارون کمار مہتا سے الگ الگ ملاقاتوں کے علاوہ سیول سیکرٹریٹ جموںمیں سینئر افسران کے ساتھ بھی ملاقاتیں کیں۔ان ملاقاتوںکے دوران جموں وکشمیرکی مجموعی سیکورٹی صورتحال کاجائزہ لینے کیساتھ ساتھ کشمیری تارکین وطن، پاکستان اورپاکستانی زیر کنٹرول جموں و کشمیرسے تعلق رکھنے والے مہاجرین،رفیوجیوں اور دیگر بے گھر افرادکی بازآبادکاری کیلئے نافذ کی جانے والی اہم اسکیموں پر پیش رفت کا جائزہ بھی لیاگیاجبکہ چیف سیکرٹری اوراعلیٰ سیول حکام کیساتھ میٹنگوںکے دوران مرکزی ٹیم نے جموں وکشمیرمیں جاری مرکزی معاونت والی اسکیموں کی عمل آوری، صنعتی سرمایہ کاری، بجلی کے منصوبوں، سیاحتی شعبے کی ترقی کوبھی زیرغور لایاگیا۔جے کے این ایس کوملی تفصیلات کے مطابق منگل کے روز مرکزی وزارت داخلہ کے حکام کی ایک اعلیٰ سطحی ٹیم مرکزی وزارت داخلہ میں جوائنٹ سکریٹری (جموں، کشمیر اور لداخ) پرشانت لوکھنڈے کی سربراہی میں جموں وکشمیر کے اپنے تین روزہ دورے کے سلسلے میں سرمائی راجدھانی جموں پہنچی ۔بتایاجاتاہے کہ مرکزی ٹیم نے منگل کی سہ پہر راج بھون جموں میں لیفٹیننٹ گورنر منوج سنہا سے ملاقات کی اور بتایاجاتاہے کہ اس ملاقات میں جموں وکشمیر سے جڑے سبھی معاملات بشمول سیکورٹی صورتحال اور جاری ترقیاتی عمل پر بھی تبادلہ خیال کیاگیا جبکہ لیفٹنٹ گورنر نے مرکزی ٹیم کو کشمیری تارکین وطن، پاکستان اورپاکستانی زیر کنٹرول جموں و کشمیرسے تعلق رکھنے والے مہاجرین،رفیوجیوں اور دیگر بے گھر افرادکی بازآبادکاری کیلئے روبہ عمل لائے جارہے اقدامات کے بارے میں بتایا۔تاہم اس میٹنگ کے بارے میں ابھی تک کوئی سرکاری بیان سامنے نہیں آیا۔جموں وکشمیر کے اپنے 3 روزہ دورے کے دوران صورتحال کا تفصیلی جائزہ لینے کے لئے مرکزی وزیر داخلہ امیت شاہ کی طرف سے تعینات کردہ وزارت داخلہ کی ٹیم نے چیف سکریٹری ڈاکٹر ارون کمار مہتا سے الگ سے ملاقات کی تاکہ وہ ترقیاتی کاموں بشمول مرکزی معاونت والی اسکیموں اوروزیراعظم ترقیاتی پیکیج کی عمل آوری کے بارے میں جانکاری حاصل کریں ۔ایک میڈیا رپورٹ میں ذرائع کا حوالہ دیتے ہوئے رپورٹ کیاگیاکہ چیف سیکرٹری کیساتھ میٹنگ میں مرکزی ٹیم نے مختلف مرکزی فنڈڈ اسکیموں کے تحت چلائے جانے والے منصوبوں کا تفصیلی جائزہ لیا ۔چیف سیکرٹری نے ٹیم کوبتایاکہ تقریباً تمام پروجیکٹ اضافی لاگت سے بچنے کےلئے ٹائم لائن پر پورا اُترنے کے لئے تیار ہیں۔ میڈیا رپورٹ کے مطابق بعدازاں ، وزارت داخلہ کی ٹیم نے صنعتی سرمایہ کاری، بجلی کے منصوبوں، سیاحتی شعبے سے متعلق کاموں، انسداد تجاوزات مہم، جسے عارضی طور پر معطل کر دیا گیا ہے، اور لینڈ رولز پر پیش رفت پر تبادلہ خیال کرنے کےلئے کچھ انتظامی سیکرٹریوں سے ملاقات کی۔بمطابق میڈیا رپورٹ ذرائع نے بتایاکہ اس میٹنگ کے دوران کشمیری تارکین وطن، پاکستان اورپاکستانی زیر کنٹرول جموں و کشمیرسے تعلق رکھنے والے مہاجرین،رفیوجیوں اور دیگر بے گھر افرادکی بازآبادکاری کیلئے نافذ کی جانے والی اہم اسکیموں پر پیش رفت کا جائزہ بھی لیاگیا۔اس دوران معلوم ہواکہ اپنے تین روزہ دورے کے دوسرے روزمرکزی ٹیم جس میں ڈائریکٹر سیکورٹی بھی شامل ہیں ،نے بدھ کوجموںمیں ایڈیشنل چیف سکریٹری (ہوم) آر کے گوئل اور جموں وکشمیرپولیس کے ڈائریکٹر جنرل دلباغ سنگھ سمیت سول اور پولیس انتظامیہ کے سینئر افسران کے ساتھ سیکورٹی جائزہ میٹنگ میں جموں و کشمیرکے تازہ سیکورٹی منظر نامے کے تناظر میں مجموعی صورتحال ،انسداد ملی ٹنسی کارروائیوں ،پنڈتوںکی ہلاکتوںکے واقعات کاجائزہ لیاگیا۔مرکزی وزیر داخلہ امت شاہ کی طرف سے تعینات،مرکزی وزارت داخلہ کی اعلیٰ سطحی ٹیم 3 دن کےلئے جموں میں رہے گی اور 2 مارچ کو نئی دہلی واپس روانہ ہوگی۔جہاں مرکزی ٹیم جموںوکشمیر کی تازہ سلامتی صورتحال ،ترقیاتی کاموںکی عمل آوری اور مرکزی معاونت والی اسکیموں پر پیش رفت کے برے میں تفصیلی رپورٹ مرکزی وزیرداخلہ امت شاہ کو پیش کرے گی۔
