سری نگر:۳۲، اگست:: جموں وکشمیر میں جاری گرمی کی شدید لہر کے چلتے سردپتھری کہلانے والی کشمیر وادی بھی سخت ترین گرمی کی لپیٹ میں ہے ۔رواں ماہ کے آغاز سے ہی پوری کشمیروادی میں شدیدگرمی جاری ہے جبکہ 5اور12،اگست کوسری نگرمیں گرمی کا40سالہ ریکارڈ اُسوقت ٹوٹ گیا ،جب دن کا درجہ حرارت 35.7ڈگری سینٹی گریڈ ریکارڈ کیاگیاجبکہ 7اگست کودرجہ حرارت35.4ڈگری سینٹی گریڈدرج ہواتھا۔ اسے پہلے یکم اگست1983اور 12اگست 2009کو سری نگر سمیت کشمیر وادی میں دن کازیادہ سے زیادہ درجہ حرارت 35.4ڈگری سینٹی گریڈ درج کیاگیاتھا ۔قابل ذکر ہے کہ سری نگرمیں ماہ اگست میںدن کا سب سے زیادہ ریکارڈ درجہ حرارت 77سال قبل یکم اگست1946کو درج ہواتھا ،جب درجہ حرارت 36.7ریکارڈ کیاگیا تھا۔جے کے این ایس کے مطابق موسمیاتی ماہرین کے اس دعوے کہ کشمیرمیں گلوبل وارمنگ کاکوئی اثر نہیں ہے ،گزشتہ کچھ برسوںکی طرح ہی رواں سال بھی کشمیر وادی میں شدیدگرمی ریکارڈ کی گئی ۔رواں سال ماہ جولائی کے اوائل سے ہی شدیدگرمی کاسلسلہ شروع ہوگیا،اور حکومت نے یکم جولائی سے10جولائی 2023تک اسکولوںمیں گرمائی تعطیلات کااعلان کیا۔اب گرمی کی لہر کایہ عالم ہے کہ اسکولی بچوں بچیوں کیساتھ ساتھ بالغ وبزرگ شہریوں کو بھی شدید گرمی کی لہر سخت ستارہی ہے ،اور دن کے وقت لوگوں کا غیر ضروری طور پر گھروں ،دفاتر یا دکانات وغیرہ سے نکلنا کافی حدتک کم ہوگیا ہے ۔منگل کے روز سری نگر میں دن کا درجہ حرارت 34.6ڈگری سینٹی گریڈ ریکارڈ کیاگیا۔منگل کوکولگام میں درجہ حرارت 31.9،اننت ناگ میں33.1،شوپیان میں34.5،پلوامہ میں32.5،بارہمولہ میں33.3،بانڈی پورہ میں32.9اوربڈگام میں 33.9ڈگری سینٹی گریڈ ریکارڈ کیاگیاجبکہ منگل کے روز کپوارہ گرم ترین مقام رہا جہاں دن کادرجہ حرارت 35ڈگری سینٹی گریڈ تک پہنچ گیا۔قابل ذکر ہے کہ یکم اور 12اگست2023کو کپوار ہ میں دن کا درجہ حرارت 36ڈگری سینٹی گریڈ سے زیادہ درج ہوا تھا۔یہاں یہ بات قابل ذکر ہے کہ ماہ جولائی سے ہی کشمیر وادی میں کافی کم مقدار میں بارش ریکارڈ کی گئی ۔ماہرین کے مطابق پوری کشمیر وادی میں ماہ جولائی اور اگست میں معمول سے 50سے95فیصد کم بارش ہوئی ۔اس دوران موسمیاتی ماہرین نے بتایاکہ بدھ کے روز کشمیروادی میں گرمی کی لہر جاری رہنے کے بیچ اوسط درجہ حرارت31سے34ڈگری سینٹی گریڈ رہا۔سری نگر ،کپوارہ ،پلوامہ ،اننت ناگ اور شوپیان گرم ترین مقامات رہے جبکہ بارہمولہ ،بانڈی پورہ ،بڈگام اور گاندربل میں درجہ حرارت31اور32ڈگری سینٹی گریڈ کے آس پاس رہا۔کشمیر وادی میں جاری شدیدگرمی کی لہر کے بارے میں موسمیاتی ماہرین کا کہناہے کہ گرمی کی رواں لہر ماہ اگست کے آخریا ماہ ستمبر کے پہلے ہفتے تک جاری رہنے کااندیشہ ہے ۔تاہم محکمہ موسمیات کے علاقائی ڈائریکٹر سونم لوٹس نے اس اُمید کااظہار کیاکہ 24اور25اگست2023کو شدیدگرمی کی لہرمیں کچھ کمی آسکتی ہے ۔تاہم انہوںنے ساتھ ہی کہاکہ فی الحال بارشوں کا کوئی امکان نہیں ہے ۔اس دوران طبی ماہرین نے لوگوں کو خبردار کیا کہ وہ گرمی کی شدت سے بچاﺅکیلئے احتیاطی تدابیر اپنائیں ۔انہوںنے لوگوںکو مشورہ دیاکہ گرمی میں پانی کا استعمال بڑھادیں ،صاف پانی کا استعمال اوآر ایس کے ساتھ کریں۔تیز دھوپ سے بچیں اور سر کو ڈھانپ کر رکھیں،گرمی میں ہلکے، ڈھیلے اور نرم کپڑے پہنیں۔طبی ماہرین نے کہاکہ گرمی میں اگر کوئی شخص بیہوش ہوجائے تو اُس کے سر پرٹھنڈا پانی ڈالیں۔انہوں نے ساتھ ہی کہاکہ متاثرہ شخص کو سایہ دار جگہ پر لے جائیں،ضروری ہوتو قریبی اسپتال سے رابطہ کریں۔دن کے گرم اوقات میں گھر کی کھڑکیوں کو بند رکھیں، پردوں کو بھی بند رکھیں۔طبی ماہرین نے کہاکہ یاد رکھیں تمام افراد بالخصوص بچوں اور بزرگوں کو گرمی میں زیادہ احتیاط کی ضرورت ہے۔انہوںنے لوگوں کو مشورہ دیتے ہوئے کہاکہ غیر ضروری سفر سے اجتناب کریں ، گھر میں رہیں حتیٰ کہ ورزش بھی کم کردیں۔طبی ماہرین نے مزید کہاکہ جسم کا درجہ حرارت کم کرنے کیلئے ٹھنڈے پانی سے نہائیں، برف اور پنکھوں کا استعمال کریں۔باہر نکلتے وقت چھتری یا ٹوپی کا استعمال کریں،پالتو جانوروں کی ضروریات کا خاص خیال رکھیں۔سفر سے قبل گاڑیوں کے انجن میں پانی اور ٹائروں میں پریشر چیک کریں۔
