سری نگر:۰۳،اگست : بھارت تقریباً3دہائیوں کے بعد بین الااقوامی مقابلہ حُسن کی میزبانی کرے گا،اور امسال مس ورلڈ2023کامقابلہ کاانعقاد نومبراوردسمبرکشمیرمیں متوقع ہے۔خیال رہے مئی2023میں سری نگرمیں منعقدہ جی 20سیاحتی ورکنگ گروپ اجلاس کے بعد یہ رواں سال کشمیرمیں بین الااقوامی سطح کی دوسری بڑی تقریب ہوگی ۔جے کے این ایس کے مطابق مس ورلڈ ایونٹ آرگنائزیشن کی چیئرپرسن جولیا مورلے نے یہاں منگل کو ایک پریس کانفرنس میں کہا کہ ایک ماہ کے طویل دورانےے پرمشتمل عالمی مقابلہ حسن سرزمین کشمیرمیں ماہ نومبر اور دسمبر2023کے درمیان منعقد کیاجائے گا۔انہوںنے کہاکہ کشمیر سیاحت کیلئے ایک بہترین جگہ ہے اورعالمی مقابلہ حسن میں شریک مختلف ممالک کی لڑکیاں یہاںمختلف سرگرمیوںمیں حصہ لیں گی ۔2022کی مس ورلڈکیرولین بیلاوسکانے کہاکہ کشمیرکی قدرتی خوبصورتی سے وہ کافی حیران ہیں اوروہ140ممالک سے لوگوں کو خوش آمدیدکہنے کی شدت سے منتظرہیں۔ پریس بریفنگ میں مس ورلڈ کیرولین بیلاوسکا، مس انڈیا سینی شیٹی، مس ورلڈ کیریبین، ایمی پینا، مس ورلڈ انگلینڈ جیسیکا گیگن، مس ورلڈ امریکہ شری سینی اور مس ایشیا پریسیلیا کارلا سپوتری یولس نے شرکت کی۔ انہوں نے کہاکہ کشمیر کے پاس سب کچھ ہے اور مس ورلڈ جیسے ایونٹ کی میزبانی کےلئے یہ بہترین جگہ ہے۔ خوبصورت حسیناﺅں کاکہناتھاکہ ہم ہندوستان کی خوبصورت جگہ، یہاں کی خوبصورت جھیلوں کو دیکھ کر بہت شکر گزار ہیں، ہر کسی نے ہمارا خیر مقدم کیا ہے۔انہوںنے کہاکہ ہمیں جو مہمان نوازی ملی وہ شاندار تھی۔ مس ورلڈ2023 ایونٹ میں 140 ممالک کی شرکت دیکھنا دلچسپ ہوگا۔ کیرولین بیلاوسکانے کہاکہ ہر جگہ کی اپنی خوبصورتی ہے، لیکن یہاں کی خوشگوار مہمان نوازی بہت زیادہ رہی ہے۔مس انڈیا، سنی شیٹی نے کہاکہ یہ ایک قابل فخر لمحہ ہے کہ مس ورلڈ 2023 کشمیر میں منعقد ہونے جا رہی ہے۔ انہوںنے مزید کہاکہ یہ لمحہ دیوالی جیسا ہوگا کیونکہ 140 ممالک ہندوستان آ رہے ہیں اور ایک خاندان کے طور پر حصہ لے رہے ہیں۔مس ورلڈ امریکہ شری سینی اور مس ورلڈ آرگنائزیشن کی چیئرپرسن اور سی ای او جولیا مورلی نے مقابلہ جیتنے والوں کے کشمیر ٹور میں شرکت کی۔بھارت تقریباً تین دہائیوں کے بعد اس مقابلے کی میزبانی کر رہا ہے۔ آخری بار ملک نے1996 میں ایونٹ کی میزبانی کی تھی۔مئی میں یہاں ہونے والے جی20 اجلاس کی بدولت71 واں مس ورلڈ2023 کا مقابلہ 140 شریک ممالک کے ساتھ اس سال کے آخر میں کشمیر میں منعقد ہونے والا ہے۔
