اسلامک یونیورسٹی اونتی پورہ میں اوزون لیئر کی اہمیت پرپروگرام منعقد

عاشق کھانڈے
اونتی پورہ //اسلامک یونیورسٹی آف سائنس اینڈ ٹیکنالوجی اور پیپلز انوائرمنٹل کونسل (پی ای سی) کے تعاون سے اوزون لئیر کی اہمیت پر زور دینے اور طلبائ، فیکلٹی اور اسٹیک ہولڈرز کو اوزون کی کمی کے مضر اثرات سے آگاہ کرنے کے لئے ایک ہفتہ طویل تقریب کا انعقاد کیا۔ اوزون ڈے کی تقریبات کا افتتاح گرین ویلی ایجوکیشنل انسٹی ٹیوٹ الٰہی باغ سرینگر میں کیا گیاتھا۔ اسی سلسلے کی ایک کڑی کے تحت یونیورسٹی کے مین کیمپس میں آج ایک مصوری مقابلے کا انعقاد عمل میں لایا گیا۔ مقابلے کا عنوان آب و ہوا کی تبدیلی کے لئے فضائی آلودگی کو ٹھیک کرنا تھا۔ مقابلے میں سرینگر ، پلوامہ اور کولگام کے گیارہ اسکولوں سے آئے ہوئے سو سے زائد طالب علموں نے فن مصوری میں طبع آزمائی کی۔ مصوری مقابلے کا افتتاح یونیورسٹی کے رجسٹرار پرفیسر نصیر اقبال نے دیگر افسران کی موجودگی میں کیا۔ انہوں نے طلبا کے مصوری نمونوں کا بغور جائزہ لیا اور موضوع کے حوالے ان سے سیر حاصل بات چیت کی۔ انہوں نے پروگرام کی کنوینر اور ڈین آف سٹوڈنٹس ڈاکٹر آصفہ معراج بابا کو یہ پروگرام منعقد کرنے کے لئے مبارک باد پیش کی۔ واضع رہے کہ مقابلے میں گریڈ کے حساب سے اول ، دوم اور سوم پوزیشن حاصل کرنے والے بچوں کو اکتوبر کے پہلے ہفتے میں اسی سلسلے کے تحت منعقد ہونے والے ایک اور پروگرام میں وزارت برائے ارضیاتی سائنس کی جانب سے نقد انعام اور توصیفی اسناد سے سرفراز کیا جائے گا۔