سرینگر:۱۹ ستمبر
ضلع سری نگر کے تمام آٹھ حلقوں میں پوسٹل بیلٹ کے ذریعے ہوم ووٹنگ کا باضابطہ آغاز ہوگیا ہے اور پولنگ کے عمل کو آسان بنانے کے لئے پوسٹل بیلٹ کا اِستعمال کیا جارہا ہے۔ اِس اَقدام کا خاص مقصد 85 برس اور اس سے زیادہ عمر کے رائے دہندگان کے ساتھ ساتھ 40 فیصد بینچ مارک جسمانی طور خاص اَفراد میں اِنتخابی شرکت کو بڑھانا ہے۔ہوم ووٹنگ کا عمل 21 ؍ستمبر 2024 ء تک تین دن تک جاری رہے گا۔ پولنگ عملہ، مائیکرو اوبزروروں اور ریزرو سمیت وقف عملے کے اَرکان کو حلقوں کے مختلف کلسٹروں میں تعینات کیا گیا ہے۔ ضلعی اِنتظامیہ نے اہل ہوم ووٹروں(اے وِی ایس سی اور اے وِی پی ڈی) کی کافی تعداد کی نشاندہی کی ہے۔ ضلع چنائو آفیسر سری نگر ڈاکٹر بلال محی الدین نے ضلعی اِنتظامیہ کی شمولیت، آزادانہ، منصفانہ اور شفاف اِنتخابات کے عزم کا اعادہ کرتے ہوئے کہا کہ ہمارا مقصد صد فیصد رائے دہندگان کی شرکت کو یقینی بنانا ہے تاکہ ہر اہل فرد اَپنے حق رائے دہی کا اِستعمال کرے۔یہ عمل الیکشن کمیشن کے اِنتخابی اوبزروروں اور سینئر اَفسران کی نگرانی میں کیا جاتا ہے جس میں شفافیت اور سا لمیت کی ضمانت دینے کے لئے مائیکرو اوبزرور موجود ہوتے ہیں۔ اِنتظامیہ اس اہم اقدام کے دوران سیکورٹی اور اِنتخابی سا لمیت کے اعلیٰ معیار کو برقرار رکھنے میں ثابت قدم ہے۔
