منڈیٹ واضح، چھیڑ چھاڑ کی کوئی گنجائش نہیں: محبوبہ مفتی

سری نگر:۸ ،اکتوبر:: پیپلز ڈیموکریٹک کی سربراہ محبوبہ مفتی نے این سی،کانگریس اتحاد کو مبارکباد دی اور کہا ہے کہ میرے خیال میں لوگ ایک مستحکم حکومت چاہتے تھے اور لوگ سمجھتے تھے کہ نیشنل کانفرنس،کانگریس مستحکم حکومت دے سکتی ہے اور بی جے پی کو دُور رکھ سکتی ہے۔انہوںنے کہاکہ پی ڈی پی اپوزیشن میں بیٹھے گی اور عوامی مسائل اٹھائے گی ۔جے کے این ایس کے مطابق پی ڈی پی کی صدر محبوبہ مفتی نے کہا کہ جموں و کشمیر کے عوام کی طرف سے دیا گیا مینڈیٹ واضح ہے اور اس کےساتھ کسی قسم کی چھیڑ چھاڑ کی کوئی گنجائش نہیں ہے۔انہوں نے کہا کہ پی ڈی پی نیچے ہے لیکن باہر نہیں ہے اور انہیں یقین ہے کہ این سی،کانگریس اکثریت حاصل کرے گی۔سری نگر میں صحافیوں سے بات کرتے ہوئے پی ڈی پی صدر نے کہا کہ مینڈیٹ واضح اور بلند ہے۔ محبوبہ مفتی نے کہاکہ ’مجھے یہ پہلے سے معلوم تھا کہ لوگ این سی،کانگریس کے اتحاد کو ووٹ دیں گے۔انہوں نے کہا کہ عوام اپنے واضح مینڈیٹ کےلئے داد کے مستحق ہیں۔محبوبہ مفتی نے ساتھ ہی کہاکہ اب مینڈیٹ کےساتھ چھیڑ چھاڑ کی کوئی گنجائش نہیں ہے۔پی ڈی پی کے زوال کے بارے میں پوچھے جانے پر، انہوں نے کہا کہ سیاست میں اتار چڑھاو ¿ آتے ہیں۔ 1996میں این سی نے 60 سیٹیں جیتی تھیں اور 2014 میں، اس نے صرف16 جیتی تھیں۔ تو سیاست میں یہ چیزیں ہوتی ہیں۔تاہم انہوں نے کہا کہ لوگوں نے بڑی چالاکی سے اس بار بی جے پی کو دُور رکھنے کے لیے ووٹ دیا ہے۔ محبوبہ مفتی نے مزید کہاکہ انتخابات کا مطلب یہ نہیں کہ عوام کے مسائل ختم ہو گئے ہیں۔ ہم اپوزیشن میں بیٹھیں گے اور لوگوں کے مسائل اٹھائیں گے۔انہوںنے کہاکہ پی ڈی پی نیچے ہے لیکن باہر نہیں ہے۔ ہم بہت زیادہ متعلقہ ہیں کیونکہ ہمارے پاس جموں و کشمیر کے لیے ایک مناسب روڈ میپ ہے۔اس سوال پر کہ کیا پی ڈی پی این سی،کانگریس کی حمایت کرے گی، پی ڈی پی کی صدر محبوبہ مفتی نے کہاکہ بیگانی شادی میں کیوں بننا ہے، عبداللہ دیوانہ (جب کوئی ضرورت نہیں ہے تو ہم ان میں کیوں شامل ہوں)۔انہوں نے کہا کہ لوگوں نے معلق اسمبلی کو ووٹ نہیں دیا۔ محبوبہ مفتی نے کہاکہ مجھے یقین ہے، این سی،کانگریس 50 سیٹوں تک پہنچ جائیں گے اور انہیں حمایت تلاش کرنے کی ضرورت نہیں پڑے گی۔