سری نگر/03جولائی2025ئوزیر اعلیٰ عمر عبداللہ نے آج وزیرجل شکتی جاوید احمد رانا کے ہمراہ سول سیکرٹریٹ سر ی نگر سے پانی کے 10 ٹینکروں کے بیڑے کو ہری جھنڈی دِکھا کر روانہ کیا۔یہ خصوصی اَقدام بالخصوص محرم الحرام کے دوران پانی کی مناسب فراہمی کو یقینی بنانے کے لئے اُٹھایا گیا ہے۔یہ اَقدام وادی کشمیر بھر میں پانی کی فراہمی کی خدمات کو بڑھانے کے لئے کیا گیا ہے بالخصوص اُن علاقوں میں جہاں گرمی کی اونچی مانگ یا جاری بنیادی ڈھانچے کی ترقی کی وجہ سے پائپ سے پانی کی ترسیل میں عارضی رُکاوٹوں کا سامنا ہے۔اِس تقریب میں متعدد ممبرانِ اسمبلی، جل شکتی محکمہ کے سینئر اَفسران، پبلک ہیلتھ اِنجینئرنگ (پی ایچ اِی) ونِگ کے نمائندے اور دیگر اَفراد موجود تھے۔اِس موقعہ پر وزیراعلیٰ عمر عبداللہ نے کہا کہ حکومت ہر گھر کو محفوظ اور صاف پینے کے پانی کی بلا تعطل رَسائی کو یقینی بنانے کے لئے پُرعزم ہے۔
