گاندربل/09جولائی2025ئ ٹرانسپورٹ کمشنر وشیش پال مہاجن نے آج اَمرناتھ یاترا کے راستے پر اہم مقامات بشمول بال تل اور دومیل بیس کیمپ کا تفصیلی دورہ کیا تاکہ جاری ٹرانسپورٹ اِنتظامات اور مختلف متعلقہ ایجنسیوں کے درمیان ہم آہنگی کا جائزہ لیا جا سکے۔ٹرانسپورٹ کمشنر کے ہمراہ اے آر ٹی او گاندربل اور دیگر فیلد اَفسران بھی تھے۔ دورے کے دوران اُنہوں نے اہم ٹرانسپورٹ پوائنٹس کا معائینہ کیا اور ایک اعلیٰ سطحی جائزہ میٹنگ کی صدارت کی جس میں ایس ایس پی ٹریفک (رورل)، کیمپ ڈائریکٹر دومیل، او سی بیکن اور ایس ایس بی کے اہلکار نے شرکت کی۔میٹنگ میں گاڑیوں کی آواجاہی کو منظم بنانے، سڑکوں کی حفاظت کو یقینی بنانے، ٹرانسپورٹ آپریشنز کی نگرانی اور ایجنسیوں کے درمیان بہتر رابطے پر توجہ مرکوز کی گئی تاکہ یاتریوں کو بہتر سہولیات فراہم کی جا سکیں۔بال تل میں ٹرانسپورٹ کمشنر نے یاتریوں کے لئے فراہم کی جانے والی مفت ٹرانسپورٹ سروسز کا جائزہ لیا۔ اُنہوں نے ڈرائیوروں سے بات چیت کی اور ہدایت دی کہ یاتریوں کو محفوظ اور آرام دہ سفر فراہم کیا جائے۔ یاتریوں نے بھی ٹرانسپورٹ سہولیات پر اطمینان کا اِظہار کیا۔
وشیش پال مہاجن نے سونہ مرگ میں ویئنگ برج کا بھی دورہ کیا اور اے آر ٹی او گاندربل کو ہدایت دی کہ اس سہولیت کی جدید کاری کے لئے جامع تجویز تیار کی جائے جس میں جدید مانیٹرنگ آلات کی تنصیب اور عملے کے لئے مناسب رہائش اور بنیادی ڈھانچے کی فراہمی شامل ہو۔
ٹرانسپورٹ کمشنر نے یاترا کارروائیوں کی کامیابی کو یقینی بنانے کے لئے مسلسل نگرانی، مو¿ثر ہم آہنگی اور عوامی خدمت کے جذبے کو برقرار رکھنے کی ضرورت پر زور دیا۔
