سرینگر، 15 نومبر. سرینگر کے مضافات میں واقع نوگام پولیس اسٹیشن میں گزشتہ رات دیر گئے ایک شدید نوعیت کے دھماکے میں نائب تحصیلدار سمیت 9 افراد جاں بحق جبکہ 29 زخمی ہو گئے۔ حکام نے اس واقعہ کی تصدیق کی ہے۔
ایک اعلیٰ افسر نے بتایا کہ یہ دھماکہ اس وقت ہوا جب اسٹیشن میں ذخیرہ کیا گیا ضبط شدہ بارودی مواد اچانک پھٹ گیا۔
ان کے مطابق یہ بارودی مواد جو غالباً امونیم نائٹریٹ تھا،حالیہ دنوں ہریانہ کے فرید آباد سے نوگام پولیس اسٹیشن لایا گیا تھا۔ اسے اس وقت ضبط کیا گیا تھا جب جموں و کشمیر پولیس اور فرید آباد پولیس نے مبینہ طور پر ڈاکٹروں پر مشتمل ایک دہشت گردانہ نیٹ ورک کا سراغ لگایا تھا۔
افسر نے بتایا کہ ”ہلاک شدگان میں زیادہ تر پولیس اہلکار اور ایف ایس ایل ٹیم کے ارکان شامل ہیں۔ ایک نائب تحصیلدار اور ایک مقامی درزی بھی جاں بحق ہونے والوں میں شامل ہیں، جبکہ 29 زخمیوں میں سے بعض کی حالت تشویش ناک ہے۔“
انہوں نے مزید بتایا کہ لاشوں کی شناخت کا عمل جاری ہے کیونکہ کچھ اجسام بری طرح جھلس چکے ہیں۔ دھماکہ اس قدر شدید تھا کہ انسانی اعضا آس پاس کے رہائشی گھروں سے بھی تقریباً 100 سے 200 میٹر کے فاصلے پر برآمد کئے گئے۔
زخمیوں کو علاج کے لیے سرینگر میں فوج کے 92 بیس اسپتال، سکمز صورہ اور ایک مقامی نجی اسپتال منتقل کیا گیا ہے۔
*(کے این او)*
