ہندوستانی ریلوے نے جموں و کشمیر کے ریاسی ضلع میں دریائے انجی پر ملک کے پہلے کیبل اسٹیڈ پل کی نئی تصاویر شیئر کی ہیں۔ زیر تعمیر انجی کھڈ پل، ادھم پور،سری نگر،بارہمولہ ریل لنک (یو ایس بی آر ایل) پروجیکٹ کا حصہ ہے، کٹرا اور ریاسی علاقوں کو ریل لنک کے ذریعے جوڑے گا۔ شاندار تصاویر ایک بڑے سٹیل فریم کے ساتھ معطلی ستون Suspension-Pillar کو دکھاتی ہیں۔ ایک بار تیار ہونے کے بعد، یہ پل دریا کی سطح سے 331 میٹر کی بلندی پر کھڑا ہو جائے گا ۔ جو پیرس کے ایفل ٹاور سے اونچا ہے۔ پل کی کل لمبائی 473.25 میٹر ہے اور اسے 96 کیبلز(موٹی رسیوں) کی مدد حاصل ہے۔انڈین ریلوے نے ایک سوشل میڈیا پوسٹ میں لکھا”انجینئرنگ کا کمال۔ ہندوستان کے پہلے کیبل اسٹیڈ ریل پل کو دیکھیں۔ انجی ندی پر واقع، انجی کھڈ پل کٹرا اور ریاسی سیکشن کو جوڑ دے گا، جو ادھم پور،سری نگر،بارہمولہ ریلوے لنک،جموں وکشمیر کا ایک حصہ ہے“۔ادھم پور،سری نگر،بارہمولہ ریل لنک کو برصغیرہندو پاک میں شروع کئے گئے سب سے مشکل منصوبوں میں سے ایک سمجھا جاتا ہے۔ اس پل کو طوفانوں اور تیز ہوائوں کو برداشت کرنے کےلئے ڈیزائن کیا گیا ہے۔ اونچائی والے علاقے کی پیچیدہ ارضیات کو دیکھتے ہوئے، پل کی تعمیر بہت مشکل ہے۔ ریلوے نے272 کلومیٹر طویل ریل لنک کو تین ذیلی حصوں میں تقسیم کیا ہے۔اکتوبر 2016 میں، انڈین ریلوے نے انجی کھڈ پل کو سہارا دینے کے لئے کیبلز(موٹی رسیوں) استعمال کرنے کا فیصلہ کیا تھا کیونکہ مرکزی علاقے میں دریائے چناب پر بنائے جانے والے مشہور پل کی طرح ایک محراب بنانا ناممکن ہوگا۔ اس کی وجہ سے، انجی پل پر ایک ہی پائلن ہے۔ حکام نے پہلے کہا تھا کہ40 میٹر گہرائی کے مائکروپائلز کا استعمال کرتے ہوئے پائلن کو عمودی ڈھلوان پر تعمیر کیا جانا تھا۔ریلوے پمپ کنکریٹنگ سسٹم کا استعمال کر رہا ہے تاکہ کارکردگی میں اضافہ ہو اور کارکنوں کو زیادہ تحفظ ملے۔
