کشمیرکے واحد شفاخانہ برائے امراض سینہ’سی ڈی اسپتال‘ واقع درگجن ڈلگیٹ سری نگر کے سربراہ ڈاکٹر نوید نذیر شاہ نے بدھ کے روز کوروناوائرس وبا ءکے خاتمے کی اُمید ظاہر کی ہے۔انہوں نے کہا کہ مارچ 2020 سے پہلی بار سی ڈی ہسپتال میں گذشتہ روز کورونا کا کوئی بھی مریض داخل نہیں کیا گیا۔جے کے این ایس کے مطابق ڈاکٹر نوید نذیر شاہ نے سماجی رابطہ گاہ ٹویٹر پرکئے اپنے ایک ٹویٹ میںلکھا”مارچ2020 سے پہلی بار ایسا ہوا کہ سی ڈی ہسپتال ڈلگیٹ سری نگر میں کورونا کا ایک بھی مریض داخل نہیں کیا گیا”۔انہوںنے اس تناظرمیں آگے لکھاکہ ُامید کی جاسکتی ہے کہ یہ وبا ءختم ہونے والی ہے۔غورطلب ہے کہ مارچ2020میں عالمگیر وبائی وائرس کوروناپھوٹ پڑنے کے بعد سے8مارچ2022تک جموں وکشمیرمیں اس مہلک وائرس میں مبتلاءہونے والے4749مریض لقمہ اجل بن گئے ،جن میں سے 2423کشمیرمیں او ر2326صوبہ جموںمیں فوت ہوگئے ۔24مہینوں کے دوران جموں وکشمیرمیں کل 4لاکھ53ہزار323کوروناوائرس میں مبتلاءہوئے ۔یہاں یہ بات بھی قابل ذکر ہے کہ مارچ2020میں کوروناپھو ٹ پڑنے کے بعددیگر شعبہ جات کیساتھ ساتھ تعلیمی سرگرمیاں بھی عملاًمفلوج ہوکررہ گئیں اور کورونا کی تیسری لہر میں نمایاں کمی واقع ہونے کے بعد وادی میں طویل مدت کے بعد ماہ رواں کی دو تاریخ سے تمام تعلیمی اداروں میں تدریسی عمل بحال ہوگیا ہے۔ادھر ماہرین کا ماننا ہے کہ لوگوں کو کورونا کی ممکنہ چوتھی لہر سے گھبرانے کی کوئی ضرورت نہیں ہے۔تاہم انہوں نے لوگوں سے اس وبا کی مکمل روک تھام کو یقینی بنانے کےلئے کورونا گائیڈ لائنز پر من و عن عمل کرنے کی تاکید کی ہے ۔
