خطہ چناب میں محض8ہفتوں میںدوسرا انتہائی خوفناک سڑک حادثہ

سری نگر:۶۱،نومبر:خطہ چناب کے پہاڑی ضلع کشتواڑ میں بدھ کی سہ پہر پیش آئے ایک المناک سڑک حادثے میں 4خواتین سمیت 8 افراد لقمہ اجل بن گئے ۔خیال رہے یہ ضلع کشتواڑ میں گزشتہ 8ہفتوں کے دوران اس نوعیت کادوسرا انتہائی خوفناک سڑک حادثہ ہے ،کیونکہ 30اگست 2022کوایک گاڑی کے گہری کھائی میں گرنے سے8افراد کی موت واقعہ ہوئی تھی ۔جے کے این ایس کے مطابق بدھ کے روزشام 6بجے کشتواڑ کے مروہ علاقے میں ایک المناک حادثے میں کم از کم 8 افراد سڑک حادثے میں اپنی جان سے ہاتھ دھو بیٹھے۔ذرائع نے بتایا کہ کشتواڑ ضلع کے مروہ کے علاقے رچل علاقے میں ایک ٹاٹا سومو گاڑی ڈرائیور کے کنٹرول سے باہر ہوکر رینی نالے میںجاگری،جسکے نتیجے میں گاڑی میں سفر کرنے والی4 خواتین سمیت 8 افراد لقمہ اجل بن گئے۔ انہوں نے بتایا کہ مقامی لوگوں اور پولیس پارٹی نے فوری طور پر ریسکیو آپریشن شروع کیا۔ انہوں نے بتایا کہ4 خواتین سمیت8 افرادموقع پر ہی ہلاک ہو گئے۔مرنے والوں میں سے7 کی شناخت محمد امین شیخ ساکنہ چنجور مارچ، عمر غنی شاہ (ڈرائیور) ساکنہ نوپاچی مروہ، محمد عرفان حجام ساکنہ قدرنا مروہ، آفاق احمد حجام ساکنہ تھچنا، صفورا بانو ساکنہ انجیر مروہ، مزملہ بانو اور آسیہ بانو ساکنان یردو مروہ شامل ہیں۔ایس ایس پی کشتواڑ شفقت حسین بٹ نے حادثے میں8 ہلاکتوں کی تصدیق کرتے ہوئے کہا کہ مقدمہ درج کر لیا گیا ہے۔ انہوں نے مزید کہا کہ تحقیقات جاری ہیں۔اسے پہلے ڈی سی کشتواڑ ڈاکٹر دیونش یادو نے بھی 8جانیں تلف ہونے کااندیشہ ظاہر کرتے ہوئے کہاکہ بازیابی کے لیے امدادی کارروائیاں جاری ہیں۔مرکزی وزیر ڈاکٹر جتیندر سنگھ نے ٹویٹ کیااورکہامتاثرین کو ہر ممکن مدد فراہم کی جا رہی ہے، ضرورت پڑنے پر مزید مدد بھی فراہم کی جائے گی۔ ، سوگوار خاندانوں سے میری دلی تعزیت۔ادھر جموں وکشمیر کے لیفٹنٹ گورنر منوج سنہا نے اس المناک حادثے میں قیمتی جانوںکے ضیاع پرسخت رنج وغم کااظہار کرتے ہوئے سوگوار خاندانوںکیساتھ ہمدردی اورتعزیت کااظہار کیا ۔انہوںنے ضلعی انتظامیہ کوہدایت دی کہ متاثرہ خاندانوںکوفوری مدد فراہم کی جائے ۔