سری نگر:۹۲،اپریل: محض 3ہفتوں کے بعد کشمیر ایک بڑی اہم بین الااقوامی تقریب کی میزبانی کرے گا،کیونکہ 22س ے24مئی2023تک مشہور زمانہ جھیل ڈل کے کنارے پرواقع شیر کشمیر انٹرنیشنل کانفرنس سینٹرSKICC میں G20 ٹورازم ورکنگ گروپ کی تیسری اور3روزہ میٹنگ منعقد ہوگی ،جس میں تقریباً 200ملکی اور غیرملکی مندوبین کی شرکت متوقع ہے ،جن میں مختلف ممبرممالک کے اہم حکومتی عہدیدار اوراعلیٰ حکام بھی شامل ہونگے ۔جے کے این ایس کے مطابق سری نگر جی20 میٹنگ جموں و کشمیر میں پہلا بڑا بین الاقوامی ایونٹ ہو گا۔ جی 20 ممبران کے علاوہ اس تقریب میں مہمان ممالک اور کئی بین الاقوامی تنظیموں کے مندوبین شرکت کریں گے۔تاریخی سری نگرشہر کو مندوبین کی میزبانی کے لئے تیار کیا جا رہا ہے۔اس سلسلے میں اپریل2017میں منظور شدہ سری نگر اسمارٹ سٹی پروجیکٹ پر بڑے پیمانے پرکام جاری ہے ۔سمارٹ سٹی پروجیکٹ2 حصوں پر مشتمل ہے: (الف) رقبہ پر مبنی ترقی جس کی لاگت کا تخمینہ2869.24کروڑ روپے ہے اور (ب) پین سٹی سلوشنز کی تخمینہ لاگت765.03کروڑ روپے ہے۔ ڈل جھیل کے کنارے پر واقع شیر کشمیر انٹرنیشنل کانفرنس سینٹر (SKICC)، جو G20 اجلاسوں کی میزبانی کےلئے بنیادی جگہ ہوگی۔ اس مقام یعنیSKICCکی تزئین و آرائش کاکام جا ری ہے،جس پر7.5کروڑ روپے خرچ کئے جارہے ہیں، جس میں ڈیجیٹل انفراسٹرکچر کو اپ ڈیٹ کرنا اور اندرونی اور بیرونی حصے کی تزئین و آرائش شامل ہے۔شیرکشمیرانٹرنیشنل کانفرنس سینٹرSKICCمیںG20ٹورازم ورکنگ گروپ کی تیسری اور3روزہ میٹنگ کی تیاریاں آخری مراحل میں ہیں، اور متعدد انتظامات جیسے کہ کثیر درجے کی سیکیورٹی اور ٹریفک ڈائیورشن کی بھی منصوبہ بندی کی جارہی ہے۔اس دوران میڈیا رپورٹس میں بتایاگیاکہ وزیراعظم نریندرمودی سری نگرمیں ہونے والی G20ٹورازم ورکنگ گروپ کی تیسری اور3روزہ میٹنگ سے اہم خطاب کریں گے ۔قابل ذکر ہے کہ جی 20 کے رکن ممالک میں ہندوستان، ارجنٹائن، برازیل، کینیڈا، چین، فرانس، جرمنی، انڈونیشیا، اٹلی، جاپان، جنوبی کوریا، روس، سعودی عرب، جنوبی افریقہ، ترکی، میکسیکو، برطانیہ، امریکہ اور یورپی یونین شامل ہیں، جبکہ اس بار خصوصی مدعو مہمان ممالک میں بنگلہ دیش، مصر، ماریشس، ہالینڈ، نائجیریا، عمان، سنگاپور، اسپین اور متحدہ عرب امارات شامل ہیں۔
