چوری کی وارداتوں سے بچنے کیلئے سٹی پولیس کالوگوںکو مشورہ

سری نگر:۹،مئی:شہر میںچوری کی وارداتوں سے بچنے اور روکنے کےلئے سری نگر پولیس نے لوگوں کو مشورہ دیا ہے کہ وہ شادی کی تقریبات میں شرکت کے دوران اپنے گھروں کو خالی نہ چھوڑیں اور قیمتی سامان ونقدی گھروں میں رکھنے سے گریز کریں۔جے کے این ایس کے مطابق سری نگر شہر کے کچھ علاقوں میں لوگوں نے دعویٰ کیا کہ چوروں نے ان کے گھروں میں گھس کر نقدی اور قیمتی سامان لوٹ لیا جب وہ شادی کی تقریب میں شرکت کے لئے گئے ہوئے تھے،اورگھرمیں کوئی موجودنہیں تھا۔اس طرح کی چوری کو روکنے کےلئے،سری نگر پولیس نے لوگوں کو مشورہ دیا ہے کہ وہ اپنے قیمتی سامان کی حفاظت کریں اور جب گھر میں کوئی موجود نہ ہوں تو نقدی اور دیگر قیمتی سامان گھر میں نہ رکھیں۔ایک اعلیٰ پولیس اہلکار نے بتایا کہ سماج دشمن عناصر خصوصاً چور ایسے گھروں پر نظر رکھتے ہیں جو تالے لگے رہتے ہیں اور جہاں خاندان کے افراد کسی تقریب میں شرکت کےلئے باہر جاتے ہیں۔انہوںنے کہاکہ یہ ہماری ذمہ داری ہے کہ لوگوں کو احتیاطی اقدام کے طور پر اپنی قیمتی اشیاءکی حفاظت کرنے کا مشورہ دیں۔پولیس افسر نے مزید کہا کہ لوگوں کو بینک لاکرز، اے ٹی ایم، ڈیبٹ اور کریڈٹ کارڈز کی سہولیات سے استفادہ کرنا چاہیے۔انہوںنے مزیدکہا کہ لوگوںکی طرف سے تھوڑی سی لاپرواہی ان کی محنت سے کمائی گئی رقم اور زیورات کو ضائع کر دے گی۔انہوں نے کہا کہ لوگوں کو چوری کی روک تھام کےلئے تعاون کر کے پولیس کی مدد کرنی چاہیے، خاص طور پر وہ جو دن کے وقت ہوتی ہیں۔اعلیٰ پولیس افسرنے کہاکہ لوگ گھر میں کم سے کم رقم رکھ سکتے ہیں کیونکہ تمام بینک،ATM اور نیٹ بینکنگ جیسی سہولیات فراہم کرتے ہیں جو کسی بھی ٹرانزیکشن یا ٹرانسفر کے لئے استعمال کی جا سکتی ہیں۔انہوں نے مزیدکہاکہ وہ قابل اعتماد اور آسان ہیں، نیز زیورات کو بینک میں محفوظ رکھنا چاہیے اور صرف وہی جو روزمرہ کے استعمال کےلئے درکار ہیں گھر میں رکھے جا سکتے ہیں۔پولیس افسرنے مزید کہا کہ اگر لوگوں کو اپنے علاقوں میں مشتبہ افراد گھومتے ہوئے پائیں تو متعلقہ تھانے کو مطلع کریں