سری نگر,29 اگست ,وادی کشمیر کے مختلف علاقوں میں جنگلی جانوروں کا انسانوں پر حملوں کا سلسلہ برا بر جاری ہے جس کے نتیجے میں شہر دیہات خاص کر بالائی علاقوں کے لوگوں میں تشویش کی لہر دوڑ گئی ہے شمالی کشمیر کے بانڈی پورہ ضلع کے نیسبل علاقے میں منگل کے روز ایک سات سالہ بچے کو تیندوے نے مار ڈالاجس کے بعد علاقے کی آبادی میں شدید خوف وہراس پایا جا رہا ہے ۔کشمیر نیوز سروس ( کے این ایس ) کے مطابق شمالی کشمیر کے ضلع بانڈی پورہ نسبل سمبل علاقے میں گھر کے صحن میں ایک سات سالہ بچہ اچانک لاپتہ ہوا ہے اس دوران یہاں تمام لوگ گھروں سے باہر آئے پولیس، 13 آر آر، سی آر پی ایف، مقامی لوگوں نے اس کا سراغ لگانے کے لیے بڑے پیمانے پر تلاشی مہم شروع کی تھی۔ تاہم لوگوں کو اس حوالے سے کوئی سراغ نہیں ملا ہے ایک اہلکار نے بتایا کہ پیر کی شام ایک لڑکا لاپتہ ہوگیاجس کے بعد یہاں تلاشی کاروائی تیز کر دی گئی ہے۔اہلکاروں نے بتایا تلاش کے دوران ایک کھیت کے قریب لڑکے کے خون کے دھبے اور کپڑے ملے تھے، جس سے انہیں شبہ ہوا کہ ایک تیندوے نے، جو اس علاقے میں اکثر دیکھا جاتا تھا، نے لڑکے پر حملہ کیا تھا۔انہوں نے بتایا کہ 10گھنٹے سے زیادہ کی تلاش کے بعد، منگل کی علی الصبح لڑکے کی مسخ شدہ لاش نیسبل میں ایک قریبی پہاڑی سے ملی۔انہوںنے متوفی کی شناخت زید بشیر ولد بشیر احمد ساکنہ نسبل کے طور پر ہوئی ہے۔ قانونی کارروائی کے بعد لاش کو آخری رسومات کے لیے اہل خانہ کے حوالے کر دیا گیا۔لاش ملنے کے بعد علاقے میں رقعت آمیز مناظر دیکھنے کو ملے ہیں جہاں خواتین کو سینہ کوبی کرتے ہوئے دیکھا گیا ہے۔جبکہ مقامی لوگوں نے بتایا کہ انہوں نے تیندوے کی موجودگی کے حوالے محکمے کو کئی بار مطلع کیا ہے تاہم انہوں نے عوامی مطالبے پر کوئی توجہ نہیں دی ہے جس کی وجہ سے آج یہ بڑا حادثہ پیش آیا ۔یہاں یہ بات قابل ذکر ہے حسب معمول وادی کشمیر کے مختلف علاقوں میں انسانوں پر جنگلی جانوروں کے حملوں کا سلسلہ برابر جاری ہے جبکہ میوہ باغات کے ساتھ ساتھ باقی اشیاءکو بھی نقصان پہنچایا گیا ہے ۔
