سری نگر,29 اگست , وسطی کشمیر کے ضلع بڈگام کے کھاگ علاقے میں ایک سرکاری اسکول میں کنکریٹ کا سلیب گرنے سے ایک افسوسناک واقعہ میں ایک مزدور کی موت ہو گئی جبکہ دوسرا زخمی ہو گیا۔یہ واقعہ منگل کی صبح گورنمنٹ بوائز مڈل اسکول کھاگ میں پیش آیا۔کشمیر نیوز سروس کے مطابق کو مقامی لوگوں نے بتایا کہ مزدور سکول کے باتھ روم کو اکھاڑ پھینکنے میں مصروف تھے جس دوران سلیب گر کر دونوں افراد کے اوپر گر گئی۔انہوں نے بتایا کہ لوہران کھاگ کا رہائشی مشتاق احمد ٹھوکر موقع پر ہی جاں بحق ہوگیا جبکہ ایک اور مزدور کی شناخت جاوید احمد شاہ کے نام سے ہوئی جسے علاج کے لیے اسپتال منتقل کردیا گیا ہے۔پولیس اور سول حکام صورتحال کا جائزہ لینے کے لیے موقع پر پہنچ گئے ہیں۔
