سری نگر17 نومبر ,وادی کشمیر میں ان دنوں شادیوں کا سیزن بڑے پیمانے پر جاری ہے جبکہ مختلف علاقوں میں کسان سیبوں کے علاوہ باقی کام کاج کے سلسلے میں موسم کا مزاج جانے کے بعد ہی کام شروع کرتے ہیں اور محکمہ موسمیات نے ان تمام لوگوں کے لئے ایک اچھی اور خوشی کی خبر دی ہے کہ آئندہ قریباً ایک ہفتے تک موسم خشک رہنے کا امکان ہے اور کسی بڑی تبدیلی کا کوئی امکان نہیں ہے ۔کشمیر نیوز سروس ( کے این ایس ) کے مطابق محکمے کے ایک ترجمان نے کہا کہ وادی کشمیر میں اگلے چوبیس گھنٹوں کے دوران موسم جزوی ابر آلود مگر خشک رہنے کا امکان ہےتاہم انہوں نے کہا کہ آئندہ ایک ہفتے یعنی18سے24تک کسی بڑی تبدیلی کا کوئی امکان نظر نہیں آرہا ہے ترجمان نے بتایا اس دوران بیچ بیچ میں موسم ابر آلود رہ سکتا ہے تاہم بارش یا برف باری کا کوئی امکان نہیں ہے۔ان کا کہنا تھا کہ اس دوران وادی میں صبح اور شام کے وقت دھند رہ سکتی ہے۔ماہر موسمیات فیضان عارف کا کہنا ہے کہ ایک کمزور مغربی ہوا وارد وادی ہو رہی ہے جس سے وادی میں گرچہ موسم خراب ہونے کا کوئی امکان نہیں ہے تاہم مطلع ابر آلود رہ سکتا ہے۔ادھر وادی کے شبانہ درجہ حرارت میں بتدریج کمی ریکارڈ ہو رہی ہے۔یہاں یہ بات قابل ذکر ہے ان دنوں کسان کام کام جس میں سیبوں کی برائی،گاس کے بیج بونا ،درختوں کی شاخ تراشی،گڈائی وغیرہ میں مصروف رہتے ہیں تاہم صبح اور شام کے اوقات میں انتہائی سردی محسوس کی جا تی ہے جبکہ دریاﺅں ،جھلیوں کے نذدیک والے علاقوں میں شدت کی سردی کے ساتھ ساتھ بعد دوپہر سے صبح11بجے تک دھند رہتی ہے تاہم خشک موسم کی وجہ سے لوگ خوش نظر آ رہے ہیں جبکہ شادی بیاہ کی تقریبات کو بھی بہتر انداز میں انجام دیا جا رہا ہے ۔
