اونتی پورہ سے ترال تک عوامی اتحاد پارٹی کا روڑ شو

سید اعجاز
ترال// عوامی اتحاد پارٹی کی جانب سے اتوار کے روز جنوبی کشمیر کے ضلع پلوامہ کے مختلف علاقوں میں انتخابی ریلیوں برآمد ہوئی جن میں لوگوں کی ایک بڑی تعداد نے شرکت کی ۔تقریب سے انجینئر رشید نے خطاب کیا ۔اس دوران اونتی پورہ سے ترال تک نکالی گئی ریلی میں جگہ جگہ پر لوگ جڑتے گرہے اور ترال بس اسٹینڈ میں ہزاروں کی تعداد میں لوگ جمع ہوئے جنہوں نے یہاںانجینئر رشید کا گرم جوشی سے استقبال کیا۔ اونتی پورہ سے ترال میگا روڈ شو کی قیادت پارٹی سربراہ انجینئر رشید، پارٹی کے حلقہ انتخاب ترال کے امیدوار ڈاکٹر ہر بخش سنگھ اور سینئر لیڈر جی این شاہین کر رہے تھے۔اونتی پورہ سے ترال تک جگہ جگہ پر لوگوں کی ایک بڑی تعداد نے انجینئر رشید کا والہانہ استقبال کیا ہے جس کی وجہ سے پندرہ منٹ کے سفر میں گھنٹوں کا وقت لگ گیا جبکہ دوسری جانب سے یہاں لوگوں کی ایک بڑی تعداد ا ن کا یہاں دن کے دو بجے سے ہی ترال بس اڈہ میں ہی انتظار کر رہے تھی ۔ ترال بس اسٹینڈ میں ہزاروں کے اجتماع سے خطاب کرتے ہوے انجینئر رشید نے بتایا کہ کشمیر میں عبداللہ اور مفتی خاندان نے آج تک تباہی مچا دی ہے اور اب لوگوں کو اس حوالے سے سنجیدگی کا مظاہرہ کرکے ان طاقتوں کے خلاف جمہوری طریقے سے ووٹ دینا چاہیے انہوں نے مرکزی حکومت کو بھی آڈے ہاتھوں لیتے ہوے کہا کہ مودی حکومت کو ڈرو مت، اور ڈراو مت کے ایجنڈے پر عمل پیرا ہونا چاہیے۔ انجینئر رشید نے میڈیا کو بتایا کہ جماعت اسلامی اور عوامی اتحاد پارٹی مل جل کر لڑے گی جہاں ہمارا امیدوار ہوگا ہم وہاں ان کا تعاون کریں گے اور جہاں وہ امیدوار کھڑے کریں گے ہم ان کی حمایت کریں گے۔اس دوران انجینئر رشید نے ضلع کے مختلف علاقوں میں ریلیوں سے خطاب کیا جس میں پاری گام سے سمیت کئی علاقے شامل ہیں ۔