سرینگر /12جون / سی این آئی // ٹنل کے آر پار جھلسا دینے والی گرمی کے بیچ دن کا درجہ حرارت 34ڈگری عبور کر گیا ۔جمعرات کو ایک مرتبہ پھر لوگوں کو شدید گرمی سے کوئی راحت نہیںملی اور دن کا درجہ حرارت 34ڈگری پار کر گیا ۔اس دوران محکمہ موسمیات کا کہنا ہے کہ وادی کشمیر میں مستقبل قریب میں بارشوں ہونے کا کوئی امکان نہیں ہے۔سی این آئی کے مطابق جہاں ماہ جون میں درجہ حرارت میں اضافہ کے نتیجے میں پائی جانے والی شدید گرمی کی وجہ سے اہل وادی کیلئے رات دن تکلیف دہ ثابت ہو رہے ہیں وہیں گرمی میں روز بروز اضافہ ہو رہا ہے جس کی ایک کڑی کے تحت سرینگر میں جمعرات کو سب سے گرم ترین دن ریکارڈ کیا گیا ۔جمعرات کو دن بھر شدید گرمی کی لہر جاری رہی جس دوران درجہ حرارت 34.2ڈگری سیلشس ریکارڈ کیا گیا جبکہ قاضی گنڈ میں دن کا درجہ حرارت 33.9سیلشس کے قریب درج کیا گیا ۔ محکمہ موسمیات نے کہا کہ کپواڑہ میں دن کا درجہ حرارت 33ڈگری اور کوکرناگ میں 33.2ڈگری سیلشس رہا ۔ محکمہ موسمیات کے مطابق جموں میں بھی گرمی کی شدید لہر جاری ہے اور 43.6ڈگری سیلشس ریکار ڈ کیا گیا ۔ محکمہ کے مطابق وادی کشمیر میں آئندہ چند دونوں میں موسم میں تبدیلی آنے کے امکانات نہیں ہے اور مجموعی طور پر موسم خشک ہی رہیگا ۔تاہم انہوں نے اس بات کے امکانات ظاہر کئے ہیں کہ گرمی کی شدت میں کمی آسکتی ہے ۔ادھر دن گرم ہونے کے ساتھ ہی مجموعی طور پر خشک موسم کی پیشینگوئی کے بیچ جموں و کشمیر کے بیشتر مقامات پر رات کے درجہ حرارت میں اضافہ ہوا محکمہ موسمیات نے بتایا کہ اگلے 24 گھنٹوں میں بنیادی طور پر خشک موسم کی توقع ہے۔ انہوں نے کہا کہ 12جون کسی ”بڑی تبدیلی“کی توقع نہیں تھی حالانکہ شام کی بارش کے امکان کو، اگرچہ کم ہے لیکن مکمل طور پر رد نہیں کیا جا سکتا۔ دریں اثنارات کے درجہ حرارت میں بھی اضافہ کا رجحان جاری رہا۔ محکمہ موسمیات نے آئندہ کچھ دنوں تک شدید گرمی کی لہر برقرار رکھنے کی پیشگوئی کرتے ہوئے عوام کو مشورہ دیا ہے کہ وہ بیشتر اوقات گھروں میں رہنے کو ترجیح دیں جبکہ زیادہ سے زیادہ پانی پینے کیلئے استعمال کریں ۔ محکمہ موسمیات کے ڈائریکٹر ڈاکٹر مختار احمد نے بدھ کے روز جموں و کشمیر میں جاری گرم اور خشک حالات کی پیش گوئی کی ہے، اس ہفتے کے آخر میں راحت کا ایک مختصر سلسلہ متوقع ہے۔ڈائریکٹر ایم ای ٹی ڈاکٹر مختار احمد نے کہا”13جون تک عام طور پر گرم اور خشک موسم رہے گا۔ 14 سے 17 جون تک، کچھ جگہوں پر ہلکی بارش یا گرج چمک کے ساتھ بارش ہوسکتی ہے ۔ “ محکمہ موسمیات کے سری نگر نے بھی ہیٹ ویو ایڈوائزری جاری کی ہے، جس میں اگلے تین دنوں میں جموں و کشمیر کے کئی مقامات پر شدید گرمی کی وارننگ دی گئی ہے۔انہوں نے کہا کہ شہریوں کو مشورہ دیا گیا ہے کہ وہ وافر مقدار میں سیال کا استعمال کریں۔ گرمی کے زیادہ اوقات (دوپہر 12 بجے سے شام 4 بجے تک) کے دوران گھر کے اندر رہیں، اور سخت بیرونی سرگرمیوں سے گریز کریں۔ دریں اثنا، کسانوں کو مشورہ دیا گیا ہے کہ وہ باقاعدہ زرعی کام جاری رکھیں۔
