راجوری 15 جون 2025 ئ عام لوگوں سے براہ راست مقامی معاملات کی تشخیص کرنے اور لوگوں کی دہلیز پر انتظامیہ کو لانے کی کوشش میں نائب وزیر اعلیٰ سریندر کمار چودھری نے نوشہرہ کی پنچائت پھاٹہ میں عوامی شکایات کے ازالہ کیمپ کا انعقاد کیا ۔ کیمپ میں مختلف شعبوں سے تعلق رکھنے والے لوگوں کی خاصی تعداد نے شرکت کی جس میں بنیادی ڈھانچے کی ترقی سے لے کر بنیادی سہولیات تک کے معاملات کو اجاگر کیا گیا جس میں بنیادی طور پر سڑک کے انفراسٹرکچر ، پانی کی کمی ، مختلف محکموں میں عملے کی کمی ، بجلی کے انفراسٹرکچر میں بہتری لانا وغیرہ شامل تھا ۔ لوگوں کے مطالبات پر غور کرتے ہوئے نائب وزیر اعلیٰ نے کہا کہ عوام کے حقیقی مطالبات کا ترجیحی بنیادوں پر ازالہ کیا جائے گا اور متعدد امور کے فوری حل کیلئے متعلقہ افسران کو موقع پر ہی ہدایات جاری کیں ۔ انہوں نے زور دے کر کہا کہ وزیر اعلیٰ عمر عبداللہ کی سربراہی میں حکومت موثر حکمرانی فراہم کرنے اور اس بات کو یقینی بنانے کیلئے وقف ہے کہ عوامی شکایات کو ترجیحی طور پر حل کیا جائے ۔
نائب وزیر اعلیٰ نے کہا کہ عوامی دربار صرف شکایات کو آواز دینے کا ایک پلیٹ فارم نہیں ہے بلکہ شراکت دار حکمرانی کیلئے ہمارے عزم کی عکاسی ہے ۔ انہوں نے مزید کہا کہ ہم اعتماد اور احتساب کو فروغ دینے کیلئے حکومت اور عوام کے مابین براہ راست مواصلات بنانے میں یقین رکھتے ہیں ۔
