جاوید ڈار نے اَپنے حلقے اِنتخاب میں سماجی بہبودکی سکیموں کا جائزہ لیا

سری نگر/10جون 2026ئوزیر برائے زرعی پیداوار، دیہی ترقی وپنچایتی راج،اِمدادِ باہمی اور الیکشن محکمہ جات جاوید احمد ڈار نے آج اَپنے حلقے میں سماجی بہبود کی مختلف سکیموں کی عمل آوری اور پیش رفت کا جائزہ لینے کے لئے ایک جائزہ میٹنگ کی صدارت کی۔میٹنگ میں کمشنر سیکرٹری سماجی بہبود سرمد حفیظ، محکمہ سماجی بہبود کے سینئر اَفسران اور دیگر متعلقہ حکام نے شرکت کی جنہوں نے معاشرے کے کمزور طبقوں کے فائدے کے لئے چلائی جانے والی فلاحی سکیموں کی کامیابیوں اور صورتحال کا تفصیلی جائزہ پیش کیا۔دورانِ میٹنگ وزیرموصوف نے مختلف پنشن سکیموں بالخصوص اولڈ ایج پنشن سکیم کے تحت مستفید ہونے والوں کی تعداد کا جائزہ لیا اورپروگرام کے تحت ابھی تک اہل مستحقین کے بارے میں تفصیلات طلب کیں۔ اُنہوں نے متعلقہ افسروں کو ہدایت دی کہ تمام مستحق افراد کی نشاندہی کر کے انہیں شفاف اور مقررہ مدت کے اندر مراعات فراہم کئے جائیں۔