جموں/وزیر برائے جل شکتی، جنگلات و ماحولیات اور قبائلی امور محکمہ جات جاوید احمد رانا نے پردھان منتری گرام سڑک یوجنا (پی ایم جی ایس وائی) کے تحت مینڈھر حلقے میں دیہی سڑک بالخصوص دُور دراز اور پہاڑی علاقوں میں رابطے کو مزید مضبوط بنانے کی ضرورت پر زور دیا تاکہ لوگوںکو بنیادی سہولیات اور سماجی و اِقتصادی مواقع تک بہتر رسائی یقینی بنائی جا سکے۔اُنہوں نے اِن باتوں کا اِظہارمینڈھر حلقہ میں پی ایم جی ایس وائی کے کاموں کی پیش رفت کا جائزہ لیتے ہوئے سول سیکرٹریٹ جموں میں منعقدہ ایک میٹنگ کی صدارت کرنے کے دوران کیا۔میٹنگ میں متعلقہ محکموں کے سینئر اَفسران نے شرکت کی۔وزیر موصوف نے مینڈھر میں پی ایم جی ایس وائی کے تحت جاری کاموں کی صورتحال کا جائزہ لیتے ہوئے جاری منصوبوں کی پیش رفت اور ٹینڈرنگ کے عمل کی صورتحال کے بارے میں معلومات حاصل کیں۔ اُنہوں نے متعلقہ اَفسران کو ہدایت دی کہ وہ تمام جاری منصوبوں کی کڑی نگرانی کریں اور مقررہ معیارات پر سختی سے عمل کرتے ہوئے ان کی بروقت تکمیل کو یقینی بنائیں۔اُنہوںنے اِس بات پر زور دیا کہ مینڈھر کے پہاڑی جغرافیائی اور دشوار گزار علاقوں کے پیش نظر قابلِ اعتماد رابطہ سڑکیں خا اہمیت کی حامل ہیں۔ اُنہوں نے کہا کہ پی ایم جی ایس وائی سڑکیں دُور درازبستیوں کو اِنتظامی مراکز سے جوڑنے اور تعلیم، صحت، بازاروں اور دیگر بنیادی سہولیات تک رَسائی کو آسان بنانے میں اہم کردار اَدا کرتی ہیں۔
