سرینگر: ووشو کی باصلاحیت کھلاڑی عایرہ چشتی نے اتراکھنڈ میں منعقدہ 38ویں نیشنل گیمز میں سلور میڈل حاصل کر کے اپنی مہارت اور لگن کا ثبوت دیا اور ایک بار پھر جموں و کشمیر کا نام روشن کر دیا۔ اطلاعت کے مطابق قومی اور بین الاقوامی سطح پر وہ مسلسل اپنی قابلیت کا لوہا منوا رہی ہیں۔ اس سے پہلے عایرہ چشتی نے انڈونیشیا میں منعقدہ آٹھویں جونیئر ووشو ورلڈ چیمپئن شپ میں بھی کانسی کا تمغہ (برونز میڈل) حاصل کیا، جبکہ انہوں نے جارجیا میں ہویے ووشو انٹرنیشنل چیمپئن شپ میں بھی گولڈ میڈل جیت کر عالمی سطح پر اپنی مہارت کا ثبوت دیا۔ ان کی غیر معمولی کارکردگی کو سرکاری سطح پر بھی سراہا گیا ہے، اور جموں و کشمیر میں "ووشو کے سب سے بڑے اعزاز” سے بھی نوازا گیا۔ یہ ایوارڈ ان کی انتھک محنت، لگن اور کھیل کے تئیں جنون کا اعتراف ہے۔ عایرہ کی جدوجہد اور کامیابی نوجوان کھلاڑیوں، خصوصاً لڑکیوں کے لیے ایک تحریک ہے، جو یہ ثابت کرتی ہے کہ عزم، محنت اور لگن سے ہر رکاوٹ کو عبور کیا جا سکتا ہے اور عالمی سطح پر کامیابی حاصل کی جا سکتی ہے۔ 38ویں نیشنل گیمز میں سلور میڈل حاصل کرنا ان کے کیریئر میں ایک اور نمایاں کامیابی ہے، جو انہیں بھارت کی بہترین ووشو فائٹرز میں شامل کرتا ہے۔
