اونتی پورہ:
انڈین کونسل آف ایگریکلچر ریسرچ کی جانب سے شروع کی جانے والی قومی مہم "وکست کرشی سنکلپ ابھیان” کے تحت سکاسٹ کشمیر نے منگل کو کے وی کے ملنگپورہ پلوامہ میں ایک اہم پریس کانفرنس کا انعقاد کیا۔ اس مہم کا باضابطہ آغاز 29 مئی سے ہوگا اور یہ 12 جون 2025 تک جاری رہے گی۔پریس کانفرنس کی صدارت اسکاسٹ کشمیر کی جانب سے مقرر کردہ نوڈل آفیسر ڈاکٹر جاوید احمد مغلو نے کی، جو کہ سینئر سائنٹسٹ اور کے وی کے ملنگ پورہ کے سربراہ ہیں۔ انہوں نے میڈیا نمائندوں سے بات کرتے ہوئے مہم کی تیاریوں اور مقاصد پر روشنی ڈالی۔ڈاکٹر جاوید مغلو نے بتایا کہ "وکست کرشی سنکلپ ابھیان” کا مقصد زرعی تحقیق اور کسانوں کے درمیان موجود خلا کو پُر کرنا ہے تاکہ جدید زرعی معلومات اور ٹیکنالوجی براہِ راست کھیتوں تک پہنچ سکے۔ اس مہم کو کرشی وگیان کیندر اور زراعت سے وابستہ دیگر محکموں کے اشتراک سے چلایا جائے گا۔انہوں نے بتایا کہ مہم کے دوران خریف فصلوں کے بہتر طریقہ کار، زرعی ٹیکنالوجی، سویل ہیلتھ کارڈ کے استعمال، گڈ ایگریکلچرل پریکٹسز اور سرکاری اسکیموں سے متعلق کسانوں کو آگاہ کیا جائے گا۔ اس کے ساتھ ساتھ کسانوں سے براہِ راست بات چیت کر کے ان کی آراء کو دستاویزی شکل دی جائے گی۔ڈاکٹر مغلو کا کہنا تھا کہ اس قومی مہم کا بنیادی مقصد کسانوں کی آمدنی کو مستحکم بنانا اور زراعت سے وابستہ افراد کو تمام ممکنہ سہولیات فراہم کرنا ہے۔
