سرینگر// جموں و کشمیر پولیس کی خدمات، قربانیوں اور امن و امان کے قیام کے لیے انجام دی گئی جدوجہد کو خراجِ تحسین پیش کرنے کے مقصد سے بنائی جانے والی پہلی بالی ووڈ فلم ‘ڈی جی پی کشمیر’کا پرومو ممبئی میں ایک پروقار تقریب کے دوران جاری کیا گیا۔تقریب میں بالی ووڈ کی متعدد معروف شخصیات، فنکاروں اور فلمی صنعت سے وابستہ افراد نے شرکت کی، جبکہ نامور گلوکار سکھ وندر سنگھ مہمانِ خصوصی کے طور پر شریک ہوئے۔فلم میں کام کررہے فنکاروںپونیت ایسار، حسین خان، شاہد لطیف، میر سرور، شارب ہاشمی،اشمت پٹیل، گیوی چہل،ڈیزی شاہ، پرگیا نائن، سارہ خان، پریدی شرما، رتیکا سین، انوشکا، ستیا ٹھاکر ،عبادت بٹ، یوئل اور سوردیپ ککڑ سمیت دیگر فنکار شامل ہیں۔ فلم سے وابستہ دیگر اداکار اور تکنیکی عملہ بھی اس موقع پر موجود تھا۔فلم کے پروڈیوسر وجے کمار نے تقریب سے خطاب کرتے ہوئے کہا کہ جب انہوں نے فلم کا اسکرپٹ سنا تو وہ اس قدر متاثر ہوئے کہ بلا تامل اس منصوبے کا حصہ بننے پر آمادہ ہوگئے۔ انہوں نے کہا کہ یہ فلم نہ صرف جموں و کشمیر پولیس کی پیشہ ورانہ خدمات کو اجاگر کرے گی بلکہ ان بہادر جوانوں کو بھی خراجِ عقیدت پیش کرے گی جنہوں نے امن و استحکام کیلئے اپنی جانوں کا نذرانہ پیش کیا۔فلم کے ہدایت کار امتیاز بٹ نے کہا کہ ڈی جی پی کشمیر ایک منفرد اور حقیقت پر مبنی کہانی ہے، جس کا مقصد عوام کو جموں و کشمیر پولیس کے کردار، چیلنجز اور کامیابیوں سے روشناس کرانا ہے۔ انہوں نے امید ظاہر کی کہ یہ فلم ناظرین میں مقبولیت حاصل کرے گی اور پولیس فورس کی قربانیوں اور خدمات کو نئی نسل تک مور انداز میں پہنچانے میں اہم کردار ادا کرے گی۔تقریب کے دوران امتیاز بٹ نے فلم کی تیاری کے مراحل اور اس منصوبے کو عملی شکل دینے میں پیش آنے والی مشکلات کا ذکر کرتے ہوئے جذباتی انداز میں اپنی جدوجہد بیان کی۔ اس موقع پر ان کی آنکھیں نم ہوگئیں، جس سے ہال میں چند لمحوں کیلئے خاموشی چھا گئی اور شرکا بھی جذباتی ہوگئے۔تقریب کے شرکا نے فلم کے موضوع کو سراہتے ہوئے اسے ایک مثبت، منفرد اور بروقت اقدام قرار دیا۔ فلم رواں برس سینما گھروں کی زینت بنے گی۔
