سری نگر/ لیفٹیننٹ گورنر منوج سنہا نے آج ڈاکٹر اے ایچ شاہ کی تصنیف کردہ کتاب ”شاردہ سے سنسد“ کی رسم رونمائی تقریب میں شرکت کی۔ اِس موقعہ پر اُنہوں نے ڈاکٹر اے ایچ شاہ کو ان کی اس علمی و تحقیقی کاوش پر دلی مُبارک باد پیش کی ۔اُنہوں نے کہا کہ یہ کتاب محض تاریخ کا بیان نہیں بلکہ ورثے اور اُمیدکے مابین، ماضی کی حکمت اور حال کی جمہوری اُمنگوں کے مابین ایک بامعنی مکالمہ قرار دیا۔لیفٹیننٹ گورنر نے اَپنے خطاب میں پہاڑی کمیونٹی کے تاریخی پس منظر، ان کی شاندار ثقافت اور صدیوں سے روایات کو محفوظ رکھنے میں ان کی اِستقامت کو اُجاگر کیا۔ اُنہوں نے زور دیا کہ یہ کتاب شاردا پیٹھ کی قدیم تہذیب کے تسلسل اور جدید بھارت کے جمہوری اِداروں کی توانائی کے بارے میں ایک نیا نقطہ نظر پیش کرتی ہے۔اُنہوں نے کہا ،”تاریخ، تہذیب اور ثقافت سے متعلق کتابیں اکثر نسلوں کے درمیان پُل کا کام کرتی ہےں ۔ ڈاکٹر اے ایچ شاہ نے ’شاردا سے سنسد‘کے ذریعے ایسا ہی ایک پُل تعمیر کیا ہے جو ہمیں یاد دِلاتا ہے کہ تاریخ اور ثقافت کبھی ختم نہیں ہوتیں بلکہ ہمارے وجود میں ہمیشہ زندہ رہتی ہیں۔“
