سری نگر :۷۱،دسمبر: چلہ کلان کے 40دنوں میں درجہ حرارت کم سے کم تررہنے کی پیش گوئی کے بیچ موسمیاتی ماہرین نے کہاہے کہ31دسمبرتک موسم کے خشک رہنے کے90فیصد امکانات ہیں ۔اس دوران جمعہ اور ہفتہ کی درمیانی رات درجہ حرارت میں معمولی اضافے کے باوجود کشمیر میں پارہ نقطہ انجماد سے نیچے ہی درج کیاگیا۔جے کے این ایس کے مطابق موسمیاتی ماہرین نے اسبات کاامکان ظاہر کیاہے کہ کشمیر وادی میں 31دسمبرتک موسم خشک رہنے کے90فیصد امکانات ہیں۔انہوںنے کہاکہ موسم خشک رہنے کی وجہ سے پوری وادی میں چلہ کلان کے 40دن انتہائی سردثابت ہونگے ۔ماہرین موسمیات کے مطابق 21دسمبر سے شروع ہونے والے چلہ کلان کے40ایام کے دوران سری نگر درجہ حرارت منفی 5سے6ڈگری سینٹی گریڈتک گرسکتا ہے ۔اسی طرح سے اننت ناگ میں درجہ حرارت منفی 6ڈگری سینٹی گریڈتنزلی کاشکار ہوسکتاہے جبکہ کپوارہ میں اس دوران کم سے کم درجہ حرارت منفی 5سے6ڈگری سینٹی گریڈتک گرسکتاہے ۔ماہرین کی مانیں تو گلمرگ میں درجہ حرارت منفی5 ڈگری سینٹی گریڈ،پہلگام،شوپیان ،پانپور اوراونتی پورہ میں منفی8ڈگری سینٹی گریڈتک نیچے آنے کاامکان ہے جبکہ بڈگام،بارہمولہ،بانڈی پورہ،اورگاندربل درجہ حرارت منفی6ڈگری سینٹی گریڈ کی نچلی سطح کوچھوسکتاہے اورکولگام میں اس دوران کم سے کم درجہ حرارت منفی6سے7ڈگری سینٹی گریڈتک گرسکتاہے ۔اس دوران جمعہ اور ہفتہ کی درمیانی رات درجہ حرارت میں معمولی اضافے کے باوجود کشمیر میں پارہ نقطہ انجماد سے نیچے ہی درج کیاگیا۔محکمہ موسمیات کے ایک اہلکارنے بتایاکہ جمعہ اور ہفتہ کی درمیانی رات سری نگرمیں کم سے کم درجہ حرارت منفی2.4ڈگری سینٹی گریڈ،قاضی گنڈ میں منفی 2.6ڈگری سینٹی گریڈ ، پہلگام میںمنفی 4.3ڈگری سینٹی گریڈ،کرناگ میں کم سے کم درجہ حرارت منفی0.6 ڈگری سینٹی گریڈ ریکارڈ ، گلمرگ میں منفی2.0 ڈگری سینٹی گریڈ اورکپواڑہ قصبے میں پارہ منفی3.8 ڈگری سینٹی گریڈ ریکارڈکیاگیا۔
