سری نگر:4،مئی : جی آر بیگ میموریل ٹرسٹ نے صوبائی انتظامیہ کی جانب سے منشیات مخالف سرگرمیاں شروع کرنے کے فیصلے کاخیر مقدم کرتے ہوئے کہا ہے کہ سرکار اور انتظامیہ کی سنجیدگی سے اس بدعت کو ختم کیا جاسکتا ہے۔ ٹرسٹ کے چیرمین اشتیاق بیگ نے اس سلسلے میں ڈویڑنل کمشنر کشمیر ، چیف سیکریٹری اور ایل جی منوج سنہا کا شکریہ اداکیا ہے جو اس معاملے میں سنجیدگی کا مظاہرہ کررہے ہیں۔ ادھرجی آر بیگ میموریل ٹرسٹ کی جانب سے منشیات مخالف مہم شدومد سے جاری ہے۔ جے کے این ایس کوموصولہ بیان کے مطابق جی آر بیگ میموریل ٹر سٹ کے رضاکاروں نے گزشتہ دو دنوں میں جموں کشمیر کے ایک درجن سے بھی زیادہ مقامات پر منشیات مخالف جانکاری پروگرام منعقد کئے۔ادھرجمعرات کے روز ضلع بارہمولہ کے مختلف علاقوں میں جانکاری پروگرام منعقد کئے گئے جبکہ حنفیہ ماڈل ہائرسیکنڈری سکول نشہ مکت ابھیان چلایا گیا جہاں پر سکول پرنسپل الطاف حسین اور مزمل بھی اس مہم کا حصہ بنے جنہوں نے منشیات کے خاتمہ پر اجتماعی کوششوں پر زور دیا۔ جی آر بیگ میموریل ٹرسٹ کے چیرمین اشتیاق بیگ نے کہا ہے کہ جموں کشمیر کے ہر ضلع اور ہر علاقے میں منشیات مخالف مہم چلائی جارہی ہے اور اس میں لوگوں کو اپنا بھر پور تعاون فراہم کرنا چاہئے۔ انہوں نے ایک بار پھر ایمہ مساجد ،علمائے کرام ، دانشوران،قلم کاروں ،پولیس افسران، سیول انتظامیہ اورسماجی کارکنوں سے اپیل کی ہے کہ وہ اس مہم کو کامیاب بناکر جموں کشمیر سے منشیات کی لت کو جڑ سے ہی ختم کرنے کےلئے اس مہم کا حصہ بنیں۔دریں اثناءجی آر بیگ میموریل ٹرسٹ کے چیرمین نے سرحدی کپوارہ کے لولاب علاقے میں 13اور 14مئی کو منشیات مخالف مہم گھر گھر چلانے کے حوالے سے ضلع بھر کے لوگوںسے اپیل کی ہے کہ وہ اس مہم میں بڑھ چڑھ کر شرکت کریں تاکہ سماج کو اس بدعت سے نجات دلانے میں عوامی بیداری پیدا ہو۔اسی کے ساتھ13اور 14مئی کو سرحدی ضلع کپوارہ کے لولاب سوگام علاقے میں ہی طبی کیمپ کا انعقاد بھی کیا جارہا ہے جس میں وادی کے بہترین معالجین حضرات اپنی خدمات انجام دیں گے جبکہ مریضوں میںمفت ادویات بھی فراہم کی جائیںگی۔
