*سرینگر /29نومبر / سی این آئی//
سرزمین گجرات سے ایک مرتبہ پھر کانگریس کو نشانہ بناتے ہوئے وزیر داخلہ امیت شاہ نے کہا کہ وزیر اعظم مودی نے اپنے فیصلہ کن اقدامات سے یہ پیغام دیا کہ بھارت کمزور نہیں ہے بلکہ جو بھی بھارت کی جانب میلی آنکھ سے دیکھنے کی کوشش کرتاہے اس کی سرزمین میں گھس کر کارروائی کرتے ہیں ۔ سی این آئی مانیٹرنگ ڈیسک کے مطابق گجرات کے وڈودرا علاقے میں ایک انتخابی ریلی سے خطاب کرتے ہوئے وزیر داخلہ امیت شاہ نے کہا کہ وزیر اعظم نریندر مودی نے دور اقتدار میںکچھ ایسے اقدامات اٹھائیں جس سے انہوں نے یہ ثابت کرکے دیا کہ بھارت کمزور ملک نہیں ہے ۔ امیت شاہ نے کانگریس کا نشانہ بناتے ہوئے کہا کہ اس کے برعکس 10 سال پہلے کی کانگریس کی قیادت والی حکومت نے پاکستان کے حمایت یافتہ ملی ٹنٹوں کو ہندوستانی فوجیوں کے سر قلم کرنے دیا ۔ امیت شاہ نے کہا کہ جب اوڑی اور پلوامہ حملے ہوئے تھے تو وزیر اعظم مودی نے فوج اور فضائیہ کو جوابی کارورائی کا حکم دیا اور انہوں نے دس دنوں میں کارورائی کی اور پاکستان میں گھس کر حملے کئے ۔ انہوں نے کہا کہ پاکستان میں ملی ٹنٹوں کے ٹھکانوں کو تباہ کرنے کیلئے سرجیکل سٹرائیکس کی گئیں اور ہمارے مسلح افراد بحفاظت واپس لوٹ گئے۔ انہوں نے کہا کہ وزیر اعظم نے ہندوستان کو محفوظ بنایا اور پیغام دیا کہ فوج اور سرحدوں کے ساتھ گڑبڑ نہ کی جائے۔ امیت شاہ نے مزید کہا ” سال 2014 میں نریندر بھائی وزیر اعظم بنے اور پاکستان کو پتہ نہیں کیا تبدیلی آئی۔ پاکستان کو یہ احساس نہیں تھا کہ منموہن سنگھ وزیر اعظم نہیں تھے، نریندر بھائی وزیر اعظم تھے“۔ انہوں نے گجرات کی ترقی سے لے کر کشمیر اور ملی ٹنسی تک کے مسائل پر کانگریس پر حملہ کرتے ہوئے کہا”کانگریس کے دور حکومت میں ریاست میں باقاعدہ فرقہ وارانہ فسادات ہوتے تھے۔ لیکن 2002 کے بعد کسی نے فرقہ وارانہ فساد پیدا کرنے کی ہمت نہیں کی“۔ شاہ نے کہا کہ کانگریس نے دفعہ 370 کو جموں و کشمیر کو 70 سال کیلئے خصوصی درجہ دینے کی اجازت دی۔ انہوں نے کہا کہ ’نہرو کی اس غلطی کو چھوٹے بچے کی طرح پیش کیا گیا “۔ وزیر داخلہ نے نرمدا بچاو¿ آندولن کی کارکن میدھا پاٹکر کے ان کی بھارت جوڑو یاترا میں شامل ہونے پر راہل گاندھی پر تنقید کی۔ انہوں نے کہا کہ گاندھی کو اس پر شرم آنی چاہئے کیونکہ پاٹکر نے نرمدا ڈیم پراجکٹ کو 20 سال تک روک دیا۔
