جموں و کشمیر کے تمام سرکاری ڈگری کالجوں کےلئے سرما ئی تعطیلات

سری نگر:۲۲،دسمبر: درجہ حرارت میں مسلسل گراوٹ کے نتیجے میں سردی کی شدت بڑھ جانے کے بعدحکومت نے پورے جموں وکشمیر کے تمام سرکاری ڈگری کالجوں کیلئے سرمائی تعطیلات کافیصلہ لیا۔یادرہے کشمیروادی اور صوبہ جموں کے سرمائی زون والے علاقوںمیں پہلے ہی پرائمری سے ہائراسکنڈری اسکولوں تک کیلئے سردیوںکی چھٹیاں شروع ہوگئی ہیں۔جے کے این ایس کے مطابق جموں و کشمیر کے محکمہ اعلیٰ تعلیم یعنی ہائیر ایجوکیشن ڈیپارٹمنٹ (HED) نے مرکزی زیرانتظام علاقے کی حدودمیں قائم تمام سرکاری ڈگری کالجوں کےلئے موسم سرما کی تعطیلات کا اعلان کیا ۔حکومت کے پرنسپل سیکرٹری برائے محکمہ اعلیٰ تعلیم آلوک کمار(آئی آرایس ) کی جانب سے 21دسمبر2022کوجاری کردہ ایک سرکاری حکم زیرنمبر 271-JK(HE)آف2022 کے مطابق کشمیروادی اور جموں ڈویڑن کے سرمائی زون کے علاقوں میں قائم ڈگری کالجوںمیں27دسمبر2022 سے 14 فروری 2023 تک موسم سرما کی تعطیلات ہوں گی۔اس کے علاوہ جموں ڈویڑن کے گرمائی زون والے علاقوں کے ڈگری کالجوں میں یکم جنوری سے 10 جنوری 2023 تک موسم سرما کی تعطیلات ہوں گی۔