ہندواڑہ، 8 فروری : شمالی کشمیر کے کپواڑہ ضلع کے کرال پورہ علاقے میں بدھ کو دم گھٹنے سے3 بچوں سمیت 5 افراد کی موت ہو گئی۔ایک اہلکار نے بتایا کہ آج صبح انہیں علاقے سے فون سے کال موصول ہوئی اور موقع پر پہنچ کر انہوں نے پانچ غیر مقامی لوگوں جن میں تین بچے بھی شامل ہیں مردہ پائے۔ انہوں نے کہا کہ ایسا لگتا ہے کہ تینوں کی موت دم گھٹنے سے ہوئی ہے۔لواحقین کا کہنا ہے کہ یہ ممکنہ طور پر دم گھٹنے کا واقعہ ہو سکتا ہے۔مرنے والوں میں ماجد انصاری (35) ولد احمد حسین، ان کی اہلیہ سوہانہ خاتون (30)، ان کے بچے فیضان انصاری (4)، ابو زر (3) اور چند دن کا شیر خوار شامل ہیں۔
بلاک میڈیکل آفیسر (بی ایم او) کرالپورہ ڈاکٹر میر شفیق نے بھی واقعے کی تصدیق کی اور کہا کہ وہ میڈیکل کے ساتھ موقع پر ہیں۔ لاشوں کو قانونی طبی کارروائیوں کے لیے ہسپتال منتقل کیا جا رہا ہے۔